NAGPAHAYAG ng pagkabahala si Commodore Jay Tarriela, ang tagapagsalita ng Philippine Coast Guard (PCG) para sa West Philippine Sea (WPS), sa mga pro-China vloggers na aktibo umanong nagpapakalat ng disimpormasyon upang baluktutin ang katotohanan tungkol sa WPS at linlangin ang sambayanang Pilipino.

Sa kanyang pagsasalita sa House tri-committee noong Martes, binigyang-diin ni Tarriela ang pangangailangang papanagutin ang mga online influencers sa maling impormasyon na nagpapahina sa pagkakaisa ng bansa at pumapabor sa interes ng ibang bansa.

“I was genuinely pleased to learn about the House of Representatives’ decision to hold a public hearing addressing fake news, disinformation, and misinformation on social media. I believe this presents an opportunity for us to finally establish legislation that holds trolls, influencers, and bloggers accountable for their online content,” ani Tarriela.

Tinukoy ni Tarriela ang disimpormasyon bilang isa sa pinakamalalaking banta sa mga pagsisikap ng gobyerno ng Pilipinas sa WPS, na pumapangalawa lamang sa direktang agresyon ng China.

“It is important to note that one of the greatest challenges facing the Philippine government in the West Philippine Sea, aside from China’s bullying, unlawful activities, and aggressive actions, is combating the spread of fake news and disinformation that obscures the true narrative of events in the West Philippine Sea, leading to confusion and division among our people,” aniya.

Ipinaliwanag niya na nagkaroon ng maling pakiramdam ng seguridad sa panahon ng nakaraang administrasyon, kung kailan pinaniwala ang publiko na kontrolado ang sitwasyon sa WPS at humina na ang agresibong kilos ng China.

“The limited reporting of these incidents, combined with the narrative that the former president’s diplomatic efforts had successfully convinced Xi Jinping to allow our fishermen to operate freely, contributed to the false sense of security among the Filipino people regarding the West Philippine Sea,” sabi pa ng opisyal.

Sinabi ni Tarriela na upang matupad ni Pangulong Ferdinand Marcos Jr. ang kanyang pangakong ipagtanggol ang soberanya ng Pilipinas, kailangang magkaisa ang bansa sa pamamagitan ng pagpapalaganap ng tamang impormasyon tungkol sa totoong sitwasyon sa WPS.

“Thus, for President Marcos to deliver his commitment of not surrendering a square inch of our territory to any foreign power, he has to unite the Filipino people, and the only way that we can unite our highly polarized country is to awaken their sense of patriotism,” aniya.

Binigyang-diin ni Tarriela na ang mga pro-China vloggers ay aktibong nagpapakalat ng maling impormasyon upang baluktutin ang katotohanan at pahinain ang posisyon ng bansa sa WPS.

Ang kanilang mga disimpormasyon ay sumusunod sa limang pangunahing argumento:

– “Challenging the Philippines’ legal standing” – Pinapahina ang 2016 arbitral ruling at maling inilalahad na may makasaysayang bisa ang 10-dash line ng China.

– “Twisting the narrative on maritime incidents” – Paulit-ulit na ginagamit ang pahayag ng China na ang mga sagupaan sa dagat ay pinasimulan ng Pilipinas, kabilang ang mga banggaan ng sasakyang pandagat.

– “Accusing the Philippines of being a US puppet” – Ipinapakita na ang transparency efforts ng bansa ay dikta lamang ng Estados Unidos at may koordinasyon sa mga dayuhang aktor.

– “Spreading a defeatist mentality” – Pinapalabas na walang kakayahan ang Pilipinas laban sa China at ang pagtatanggol sa mga karapatan nito ay hahantong lamang sa digmaan.

– “Blaming the Marcos administration for tensions” – Ipinapalabas na lumala lamang ang tensyon sa ilalim ng kasalukuyang administrasyon habang hindi binabanggit ang matagal nang pananakop ng China.

Ayon kay Tarriela, ang mga taktikang ito ay naglalayong hatiin ang publiko, lumikha ng pagdududa at pahinain ang determinasyon ng bansa sa pagtatanggol ng maritime rights nito.

Bukod sa pagpapalaganap ng maling impormasyon, sinabi rin ni Tarriela na ang mga pro-China vloggers ay nagsasagawa ng personal na paninira laban sa mga lumalaban sa agresyon ng China.

“When we launched our transparency initiative aimed at exposing Chinese aggression in the West Philippine Sea, I was relatively unknown, having just returned from Tokyo after completing my PhD. However, as we gained traction in the weeks following our launch, I became a target for these trolls who sought to tarnish my reputation as the Philippine Coast Guard spokesperson for the West Philippine Sea,” aniya.

Ibinunyag ni Tarriela na naging biktima siya ng mga disimpormasyon mula sa pro-China vloggers na may layuning sirain ang kanyang reputasyon sa pamamagitan ng mga gawa-gawang akusasyon:

– Pagbabanggit sa kanyang dating pagkakatanggal bilang kadete ng Philippine Military Academy upang atakihin ang kanyang kredibilidad.

– Pagsasangkot sa kanya bilang isang CIA recruit at isang pro-US operative na kumikilos laban sa China.

– Pagpapakalat ng maling balita na nakatanggap siya ng “$4 million talent fee.”

– Paggawa ng kwento na bumisita siya sa tahanan ni Speaker Martin Romualdez upang kumuha ng “three black bags.”

“While these lies are absurd, they are not only frustrating but also deeply unfair to my family,” aniya.

Ipinakita ng karanasan ni Tarriela kung paano pinupuntirya ng mga pro-China vloggers ang mga nagsasalita laban sa agresyon ng China upang patahimikin at sirain ang kanilang kredibilidad.

Sa kabila ng paglaganap ng pro-China disinformation, sinabi ni Tarriela na malaki ang naitulong ng pagpapalaganap ng tamang impormasyon, batay sa mga survey na nagpapakita ng malawakang suporta para sa pagtatanggol ng gobyerno sa WPS.

“Fortunately, over the past two years, we have successfully achieved our objectives. Regarding the awareness of the Filipino people, a recent survey conducted by OCTA Research revealed that 84% of Filipinos support the national government’s efforts to defend and assert maritime rights in the West Philippine Sea,” aniya.

Dagdag pa niya, pito sa bawat 10 Pilipino ay hindi malamang na susuporta sa mga pro-China kandidato sa nalalapit na 2025 midterm elections, isang indikasyon na naging epektibo ang mga pagsisikap na labanan ang disimpormasyon.

Gayunpaman, binalaan ni Tarriela na habang tumataas ang kamalayan ng publiko, lalo pang titindi ang pagsisikap ng mga pro-China vloggers na manipulahin ang mga online na naratibo at impluwensyahan ang pambansang mga patakaran.

Dahil ang social media ang pangunahing larangan ng labanan sa disimpormasyon, kinakailangan ng mas mahigpit na regulasyon sa online content upang maiwasan ang pananakop ng dayuhang propaganda sa usapin ng pambansang seguridad.

Habang patuloy na iginigiit ng Pilipinas ang karapatan nito sa teritoryo, nananatiling isang sandata ng Beijing ang mga pro-China vloggers sa “information warfare.”

Sa pamamagitan ng batas at pagiging mapanuri ng publiko, naniniwala si Tarriela na kayang labanan ng bansa ang mga mapanlinlang na kwento at ipagtanggol ang katotohanan.

“I am committed to my role in exposing Chinese aggression and raising awareness among the Filipino people so that we can unite as one nation with a renewed sense of patriotism. My efforts are not motivated by U.S. interests or political gain; my dedication is for the future generations of Filipinos,” aniya.