SA unang pagkakataon matapos ang 2025 midterm election, nagpulong noong Biyernes ang mga lider ng iba’t ibang partido politikal sa Kamara de Representantes upang talakayin ang mga trabaho na maaaring ihabol sa nalalabing panahon ng 19th Congress at paghandaan ang pagpasok ng 20th Congress.

Ginanap ang pagpupulong ng mga senior House leaders at ilang personalidad sa Shangri-La Hotel sa Makati upang pag-usapan ang mga hakbang para sa bagong Kongreso, na nakatuon sa pagpapatuloy ng mga gawain sa lehislatura at suporta sa Bagong Pilipinas agenda ni Pangulong Ferdinand “Bongbong” R. Marcos Jr.

Ayon kay Quezon 2nd District Rep. David “Jay-Jay” Suarez, stalwart ng Lakas-Christian Muslim Democrats (Lakas-CMD), limitado ang termino ng mga kongresista sa tatlong taon kaya dapat ay magtrabaho ng maaga.

“Purely administrative matters were tackled. We have three years and 315 congressmen—so there’s a lot of groundwork to be laid out, especially on committee assignments and organizational concerns,” ayon kay Suarez, ang kasalukuyang Deputy Speaker at treasurer ng Lakas-CMD.

Sinabi ni Suarez na ang maagang paghahanda ay mahalaga upang matiyak na magiging maayos at mabilis ang pagsisimula ng trabaho ng Kamara sa Ika-20 Kongreso.

“Ayaw naman natin mangyari na kung kailan tumatakbo na ang Kongreso saka pa lang tayo bumubuo ng organisasyon. Dapat pagpasok ng July 1 trabaho na agad,” ani Suarez.

Inilarawan ni Suarez ang pagtitipon bilang isang “meet and greet,” dahil ito ang unang pagkakataon na nagkatipon muli ang mga pinuno ng partido matapos ang nakakapagod na kampanya.

Ngunit higit pa roon, sinabi ni Suarez na ang pulong ay nagsilbing senyales ng pagkakaisa ng koalisyon para sa pagpapatuloy sa susunod na Kongreso—na nakasalalay sa inaasahang pananatili ni Leyte 1st District Rep. Ferdinand Martin G. Romualdez bilang Speaker of the House.

“We are the dominant majority party—if I’m not mistaken, we have around 103 elected congressmen—and we are 100% behind the leadership of Speaker Ferdinand Martin G. Romualdez. This is all under the banner of continuity,” giit ni Suarez.

Dumalo sa pulong si House Secretary General Reginald “Reggie” S. Velasco at ang mga pinuno ng mga partido at mga magbabalik na miyembro ng Kamara sa 20th Congress, kabilang sina Reps. Yevgeny Vincente “Bambi” Emano (Misamis Oriental, Nacionalista Party), Romeo M. Acop (Antipolo City, National Unity Party), Albert S. “Abet” Garcia (Bataan, NUP), Jose “Bong” J. Teves Jr. (TGP Party-list, Party-List Coalition Foundation Inc.), Jose C. “Pepito” Alvarez (Palawan, NUP), Wilfrido Mark M. Enverga (Quezon, Nationalist People’s Coalition), Luis Raymund “LRay” Villafuerte Jr. (Camarines Sur, NUP President) at Eleandro Jesus “Budoy” Madrona (Romblon, Nacionalista Party); Alfredo A. “Pido” Garbin Jr. (Ako Bicol Party-list, PCFI); Deputy Speaker Kristine Singson-Meehan (Ilocos Sur, NPC); Ronnie Puno (NUP Chairman); Senior Deputy Speaker Aurelio “Dong” D. Gonzales Jr. (Pampanga, Lakas-CMD); House Majority Leader Manuel Jose “Mannix” Dalipe (Zamboanga City, Lakas-CMD); at Deputy Speaker Raymond Democrito Mendoza (TUCP Party-list, PCFI).