BIGONG makakulimbat ang 28-anyos na lalaki nang mabuking ng manager sa isang kompanya noong Miyerkules sa Makati City.

Tinutukan pa ng pen gun ng suspek na si alyas Ryan ang manager nang abutan siya sa loob ng opisina kaya nagawang makalabas para tumakas.

Sa ulat ng Makati police kay Southern Police District (SPD) director P/BGen. Manuel Abrugena, hindi nasiraan ng loob ang manager at hinabol ang suspek hanggang makahingi ng tulong sa mga nagpapatrulyang tauhan ng Makati Police Sub-Station 2 kaya nadakip dakong alas-2:40 ng hapon sa Zobel Roxas St. ang suspek.

Napagalaman na habang naka-lunch break ang mga kawani ng Omee Trading Corporation na nasa kanto ng Eureka at Zobel Roxas Sts., Brgy. La Paz, sumalisi papasok ang suspek kaya dito na siya inabutan ng tagapangasiwa na kaagad bumalik ng opisina pagkatapos kumain.

Matapos madakip, nakumpiska kay alyas Ryan ang isang pen gun na ginamit niya sa panunutok.

Nahaharap ang suspek sa kasong pananakot, trespassing, paglabag sa Comelec gun ban at paglabag sa Comprehensive Firearms and Ammunition Act.