TINATAYANG P6.6 bilyong halaga ng shabu ang nasamsam sa loob ng isang malaking lihim na laboratoryo ng droga na sinalakay ng mga awtoridad sa Lungsod ng Valenzuela noong nakaraang Linggo, ayon kay Director General at Usec. Isagani R. Nerez ng Philippine Drug Enforcement Agency (PDEA) nitong Miyerkules.

Ayon kay Nerez, sa tulong ng Philippine National Police (PNP), nabuwag nila ang malaking tagong pabrika ng droga sa loob ng isang bodega sa Industrial Park, Barangay Veinte Reales, Valenzuela City, noong Linggo ng umaga.

Bago madiskubre ang nasabing laboratoryo, inaresto ng mga ahente mula sa Regional Office 4-A ng ahensiya, Cavite Provincial Office at National Capital Region Office, sa pakikipag-ugnayan sa

Valenzuela City Police Station, ang isang 30-anyos na pangunahing target sa droga na nakilalang si alyas “JP,” na residente ng Cubao, Quezon City, bandang alas-4:15 ng madaling araw noong Linggo.

Nasamsam mula sa suspek ang 500 gramo ng tinaguriang “poor man’s cocaine” na nagkakahalagang P3.4 milyon at ang buy-bust money na may kasamang markadong pera.

“Ang transaksyon ang nagbigay-daan sa mga awtoridad upang matuklasan ang shabu laboratory na matagal nang minamanmanan sa pamamagitan ng tuloy-tuloy na intelligence monitoring na nag-ugat sa mga nakaraang anti-drug operations,” ani Nerez.

Sinabi ng opisyal na sa isinagawang follow-up raid sa pasilidad sa Valenzuela City ay nasamsam ang 906.4064 kilo ng shabu na nagkakahalaga ng P6,163,563,520 at 64.15 litro ng likidong methamphetamine na nagkakahalaga ng P436,220,000, kasama ang iba pang controlled precursors at mahahalagang kemikal, pati na iba’t ibang kagamitang panglaboratoryo na ginagamit sa paggawa ng mapanganib na droga.

Kasalukuyang nasa kustodiya ng PDEA ang suspek at haharap sa mga kasong walang piyansa dahil sa paglabag sa Section 5 (pagbebenta ng mapanganib na droga), Section 8 (paggawa ng mapanganib na droga), at Section 11 (pag-iingat ng mapanganib na droga) sa ilalim ng Article II ng Republic Act No. 9165, o Comprehensive Dangerous Drugs Act of 2002, ayon kay Nerez.

“Ito ay isa sa pinakamahalagang pagkakadiskubre ng drug laboratory sa mga nakaraang taon. Ang dami ng shabu na nasamsam ay halos isang metriko tonelada na sana’y kumalat sa mga komunidad sa Metro Manila at iba pang lugar,” dagdag ng opisyal.

Ayon pa sa pinuno ng PDEA, bahagi ng kanilang pagsisikap na bawasan ang suplay ng droga sa pagtutok sa mga lihim na laboratoryo, na direktang tumatama sa pinakapuso ng ilegal na supply chain ng droga at nagpapahina sa mga distribution network, bago pa makarating ang mga ito sa mga lansangan.

Pinuri rin ni Nerez ang matatag na kooperasyon ni Valenzuela City Mayor Wes Gatchalian, na nagbigay ng malakas at tuloy-tuloy na suporta sa kampanya ng pamahalaan laban sa ilegal na droga,

pati ang PNP sa pamumuno ni General Jose Melencio C. Nartatez Jr. para sa kanilang papel sa matagumpay na pagsasagawa ng operasyon.

“Ang napakahalagang tulong ni Mayor Gatchalian ang nagpadali sa tagumpay ng imbestigasyon. Ang aming tagumpay ay nakasalalay sa pagkakaisa. Ipinapakita ng operasyong ito kung ano ang maaaring makamit kapag ang mga ahensiya ng pagpapatupad ng batas at mga lokal na pamahalaan ay nagkakaisa laban sa salot ng droga,” ani Nerez.

Sinabi rin niya na ang kanilang pinakahuling malaking tagumpay laban sa ilegal na droga ay alinsunod sa direktiba ni Pangulong Ferdinand R. Marcos Jr. na paigtingin ang intelligence-driven operations sa buong bansa, upang buwagin ang mga lihim na laboratoryo at guluhin ang supply chain ng ilegal na droga.