𝗜𝗚𝗜𝗡𝗜𝗜𝗧 𝗻𝗶 𝗠𝗮𝗻𝗶𝗹𝗮 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗹𝗮𝗻𝗱𝗼 “𝗖𝗥𝗩” 𝗠. 𝗩𝗮𝗹𝗲𝗿𝗶𝗮𝗻𝗼 𝘀𝗮 𝗗𝗲𝗽𝗮𝗿𝘁𝗺𝗲𝗻𝘁 𝗼𝗳 𝗜𝗻𝘁𝗲𝗿𝗶𝗼𝗿 𝗮𝗻𝗱 𝗟𝗼𝗰𝗮𝗹 𝗚𝗼𝘃𝗲𝗿𝗻𝗺𝗲𝗻𝘁 (𝗗𝗜𝗟𝗚) 𝗻𝗮 𝗸𝗶𝗻𝗮𝗸𝗮𝗶𝗹𝗮𝗻𝗴𝗮𝗻 𝗯𝘂𝘀𝗶𝘀𝗶𝗶𝗻 𝗻𝗶𝘁𝗼𝗻𝗴 𝗺𝗮𝗯𝘂𝘁𝗶 𝗮𝘁 𝗺𝗮𝘀𝘂𝘀𝗶𝗻𝗴 𝗶𝗺𝗯𝗲𝘀𝘁𝗶𝗴𝗮𝗵𝗮𝗻 𝗮𝗻𝗴 𝗽𝗼𝘀𝗶𝗯𝗹𝗲𝗻𝗴 𝗽𝗮𝗿𝘁𝗶𝘀𝗶𝗽𝗮𝘀𝘆𝗼𝗻 𝗻𝗴 𝗶𝗹𝗮𝗻𝗴 𝗸𝗶𝗹𝗮𝗹𝗮𝗻𝗴 𝗽𝗲𝗿𝘀𝗼𝗻𝗮𝗹𝗶𝗱𝗮𝗱 𝘀𝗮 𝗴𝗶𝗻𝗮𝘄𝗮𝗻𝗴 𝗽𝗮𝗴𝘁𝗮𝘁𝗮𝗴𝗼 𝘀𝗮 𝗯𝗮𝘁𝗮𝘀 𝗻𝗶 𝗞𝗶𝗻𝗴𝗱𝗼𝗺 𝗼𝗳 𝗝𝗲𝘀𝘂𝘀 𝗖𝗵𝗿𝗶𝘀𝘁 (𝗞𝗢𝗝𝗖) 𝗣𝗮𝘀𝘁𝗼𝗿 𝗔𝗽𝗼𝗹𝗹𝗼 𝗖. 𝗤𝘂𝗶𝗯𝗼𝗹𝗼𝘆.

Binigyang diin ni Valeriano, chairman ng House Committee on Metro Manila Development, na hindi dapat palampasin ni DILG Sec. Benhur Abalos ang mga kilalang personalidad na pinaniniwalaang nagkanlong kay Quiboloy upang pagtaguan nito ang batas sa loob ng anim na buwan.

Paliwanag ni Valeriano na matapos ang ginawang pagsuko ni Quiboloy dapat simulan na rin ng pamunuan ng DILG ang pagsasampa ng kasong “obstruction of justice” laban sa mga di-umano’y kaalyado ni Quiboloy na posibleng nagbigay sa kaniya ng proteksiyon kasabay ng pagtanggi nilang makipag-kooperasyon sa mga awtoridad na tumutugis sa wanted na lider ng KOJC.

Kinakatigan din ng kongresista ang pananaw ng mga kapwa nito mambabatas na posibleng maharap din sa hukuman o masampahan ng kaso si dating Pangulong Rodrigo Roa Duterte bunsod ng umano’y pagkakanlong nito sa puganteng si Quiboloy na tumatayong “spiritual adviser” ng dating Punong Ehekutibo.

Muling pagdidiin ni Valeriano na dapat maipakita ng DILG na, “No one is above the law” kahit na ang nasasangkot ay dati pang mataas na opisyal ng pamahalaan upang maipakita sa mga mamamayan na walang kinikilingan ang batas.