MAKIKIPAG-UGNAYAN ang Philippine Postal Corporation (PHLPost) sa mga barangay upang mahanap ang mga may-ari ng national identification card na hindi matagpuan ng mga nagde-deliver nito.

Ayon kay Postmaster general at CEO Norman Fulgencio plano nilang magsagawa ng plaza-type na distribusyon ng mga national ID.

Nais umano ng PHLPost na pasabihan ng mga barangay ang mga may-ari ng ID kung kailan at saan nila ito maaaring makuha matapos na mabigo ang kanilang courier na maibigay ito sa kani-kanilang bahay.

Tatlong beses umanong tinatangka ng mga courier na ideliver ang mga ID at kung wala ang may-ari ay ibabalik na ito sa kanila.

Nasa 700,000 national ID pa umano ang hawak ng PHLPost at susubukan nila na madala ang mga ito sa may-ari.

Ayon sa Philippine Statistics Authority (PSA) nasa 92 milyong Pilipino ang kuwalipikado na kumuha ng national ID.

Sa bilang na ito ay 14 milyon na ang nai-deliver na ng PHLPost.