Sen. Risa Hontiveros: 

NAGPAHAYAG ng matinding pagkabahala si Senador Risa Hontiveros kaugnay sa umano’y pagkakasangkot ng isang dating hepe ng Philippine National Police (PNP) sa isang bribery scheme na may kaugnayan sa mga Philippine offshore gaming operator (POGO).

Ang nakababahalang rebelasyong ito, kung mapatutunayan, ay magpapakita kung paano naging bulnerable ang mga opisyal ng law enforcement sa pera ng POGO — isang seryosong isyu na nagbabanta sa pampublikong kaayusan at pambansang seguridad.

Sa isang pagdinig ng Senado, pinuna ni Hontiveros ang bigat ng mga alegasyon at sinabi niya, “Kung totoo nga na may dating Chief PNP na nasa payroll ni Guo Hua Ping o ng mga POGO, this shows how vulnerable our law enforcers have become to POGO money.”

Binigyang-diin din niya ang pangangailangan ng transparency at pananagutan, at binanggit ang posibleng pinsalang dulot nito sa tiwala ng publiko kung mapatunayang ang mga matataas na opisyal, na may tungkuling protektahan ang kapayapaan, ay nagiging kasangkapan pa sa pagpapalaganap ng mga krimen kaugnay sa mga POGO.

“Hindi katanggap-tanggap ang posibilidad na ang isang dating mataas na opisyal ng gobyerno, na may mandatong protektahan ang kapayapaan ng ating lipunan, ang naging instrumento pa pala para lumaganap ang mga krimen ng mga POGO,” dagdag ni Hontiveros.

Ang kontrobersiya ay umiikot sa mga alegasyon na isang dating mataas na opisyal ng pulisya ang nasa payroll ng mga POGO na pinapatakbo ni Guo Hua Ping.

Nagpatotoo si Ret. Gen. Raul Villanueva, senior vice president for security ng Philippine Amusement and Gaming Corp. (Pagcor), na may mga usap-usapan sa loob ng intelligence community ukol sa nasabing bribery.

“Wala pa pong confirmation, ma’am, kung may mga witnesses na mayroon talagang nabigyan. But ‘yan ang usap-usapan ngayon,” aniya at kinumpirma na patuloy pang iniimbestigahan ang mga paratang.

Sa pagdinig, humarap si Fortunato Manahan Jr., hepe ng Intelligence Division ng Bureau of Immigration (BI), upang sagutin ang mga tanong kaugnay sa pagtakas ni Guo Hua Ping mula sa Pilipinas.

Kinuwestiyon siya ni Hontiveros kung may mga opisyal ng BI na nasuhulan para mapadali ang pagtakas at tinukoy ang mga ulat ng P200 milyong suhol. Kinumpirma ni Manahan na nakatanggap sila ng intelligence tungkol sa halaga, ngunit nilinaw na wala pang opisyal ng BI na direktang nasasangkot.

“Nakakuha po tayo ng intelligence information with regard to the amount, pero po with regard to doon sa tumanggap… that amount na isang BI personnel or associated sa BI, wala pa ho pero we’re still validating,” paliwanag niya.

Pinalala pa ng sitwasyon ang pahayag ni Brigadier General Raul Tacaca, deputy director ng Criminal Investigation and Detection Group (CIDG), na walang mga pormal na ulat na nagsasangkot sa mga opisyal ng PNP sa pag-alis ni Guo.

Gayunpaman, tiniyak ni Tacaca sa Senado na nakikipagugnayan ang PNP sa ibang mga ahensya at maghahain ng mga kaso kung may lumabas na ebidensya.

Nagpatotoo rin si Director Ferlo Silvio ng National Intelligence Coordinating Agency (NICA) at kinumpirma na nakikipagtulungan ang NICA sa mga ahensya ng pagpapatupad ng batas sa mga kalapit-bansa, partikular na sa Malaysia at Indonesia, upang imbestigahan ang mga aktibidad ng mga kapatid ni Guo at mga posibleng sangkot na opisyal ng gobyerno.

“May pagtuloy-tuloy na pag-uusap po ngayon ng aming liaison officers kasama po ‘yung police attachés ng dalawang post, Malaysia saka Indonesia,” ulat ni Silvio.

Habang nagpapatuloy ang imbestigasyon, muling nanawagan si Hontiveros para sa agarang aksyon at pananagutan.

“To bring back trust in our institutions, there must be accountability,” pahayag niya at hinihimok ang mga awtoridad na pabilisin ang imbestigasyon at tiyaking ang lahat ng sangkot, gaano man kataas ang ranggo o posisyon, ay haharap sa buong bigat ng batas.

Inaasahang magkakaroon pa ng mga pagdinig ang Senado upang tuklasin ang karagdagang detalye tungkol sa mga iligal na operasyon ng POGO at posibleng pagkakasangkot ng mga matataas na opisyal.