BINARIL at napatay ang 53-anyos na purok leader ng dalawang hindi nakikilalang lalaki sakay ng motorsiklo sa Quezon City noong Sabado.

Sa report ng Criminal Investigation and Detection Unit ng Quezon City Police District (QCPD), bandang alas-7:30 ng gabi nang maganap ang pamamaril sa biktimang si alias Bonavente sa harap ng Dema building sa kanto ng Commonwealth Ave. at Amity St. sa Brgy. Batasan Hills.

Batay sa imbestigasyon ni P/MSg George Caculba, abala ang saksi na si alias Riza sa pag-aayos mga panindang pagkain nang makarinig ng isang putok ng baril.

Nang kaniyang usisain, bumungad sa kaniya ang duguang biktima na nakadapa sa lupa.

Nakita pa ng saksi na isa sa mga suspek ang lumapit sa biktima at kinuha ang sling bag nito saka sumakay sa kanilang motorsiklo na minamaneho ng kanyang kasama.

Isinugod ang biktima sa Rosario Maclang Bautista General Hospital ngunit idineklara itong dead-on-arrival dakong alas-8:14 ng gabi.