HINDI maaaring makilahok o bumoto ang isang suspendidong senador sa impeachment trial ni Bise Presidente Sara Z. Duterte, ngunit nananatiling kailangan ang 16 na boto — o dalawang-katlo ng 24 na miyembrong Senado — upang mahatulan siya, ayon kay House prosecutor at Bicol Saro Party-list Rep. Terry L. Ridon noong nakaraang weekend.

Sa Saturday News Forum sa Dapo Restaurant sa Quezon City, nilinaw ni Ridon ang usapin matapos tanungin tungkol sa posibleng epekto ng mga susunod pang suspensyon sa Senado sa nalalapit na impeachment trial ni Duterte at kung maaari pa ring bumoto ang mga suspendidong senador sa kaso.

“Ang pagkakaintindi ko po, hindi lang para sa senador kundi para sa lahat ng miyembro, House man o Senado, kapag suspendido ka, hindi ka maaaring lumahok sa anumang committee proceedings at hindi ka rin maaaring makilahok sa plenary proceedings,” sabi ni Ridon.

“Ibig sabihin po noon, siyempre kung hindi ka maaaring magsalita, hindi ka rin maaaring bumoto,” dagdag ng chairperson ng House Committee on Public Accounts.

Gayunman, binigyang-diin ni Ridon na hindi binabago ng suspensyon ang kinakailangang bilang ng boto ayon sa Konstitusyon para sa conviction.

“Kahit sino pa po iyan, personality blind po tayo — basta hindi mo maabot ang 16, hindi ka maaaring mahatulan,” sabi ni Ridon, na isa ring abogado.

“Kaya ang suspensyon po ay hindi talaga nakaaapekto sa conviction ng sinumang impeachable official.”

Iginiit ni Ridon na kailangan pa rin ng prosekusyon ang 16 na boto upang mahatulan si Duterte, gaano man karami ang suspendidong senador.

“Hindi po nagbabago ang threshold vote na kailangan para mahatulan ang isang impeachable official, kaya 16 pa rin po ang kinakailangang boto para sa conviction,” aniya.

Nauna nang in-impeach ng House of Representatives si Duterte dahil sa mga alegasyon ng maling paggamit ng P612.5 milyong confidential funds, hindi maipaliwanag na yaman, panunuhol, at pagbabanta laban kina Pangulong Ferdinand R. Marcos Jr., First Lady Liza Araneta-Marcos, at dating Speaker Ferdinand Martin G. Romualdez.

Naipadala na sa Senado ang Articles of Impeachment, at inaasahang magtitipon ang Senado bilang impeachment court.

Nauna namang sinabi ni Senate President Alan Peter Cayetano na agad na uusad ang kapulungan sa prosesong itinakda ng Konstitusyon at bubuuin ang impeachment court sa Lunes, Mayo 18.