HANDA ang dating Speaker na si Ferdinand Martin G. Romualdez na harapin ang anumang reklamong maaaring ihain laban sa kanya ng Tanggapan ng Ombudsman kaugnay ng umano’y flood control scam, ayon sa kanyang legal na tagapayo na si Ade Fajardo nitong Linggo.

Sinabi ni Fajardo na walang ebidensya laban sa kanyang kliyente.

“Former Speaker Romualdez ay handang harapin ang proseso. Pero talagang walang patunay o ebidensya laban sa kanya kaugnay ng mga anomalya sa flood control. Wala pa pong preliminary investigation; nasa case build-up status pa lamang ito ngayon,” ani Fajardo.

Sinabi niya na walang naging partisipasyon ang dating pinuno ng Kamara sa pagpopondo at pagpapatupad ng mga proyektong flood control.

“Napakasimple lang talaga. Kung wala ka namang naging partisipasyon, maaasahan mo talagang walang ebidensya laban sa iyo,” aniya.

Sinabi rin ni Fajardo na hindi kapani-paniwala ang pabago-bagong mga testimonya ng tinatawag na mga bodyguard.

“Paano mo naman aasahan at paniniwalaan ang kanilang salaysay na pabago-bago at paiba-iba? Puno pa ito ng mga hindi kapani-paniwalang pahayag,” aniya.

Itinuro ng abogado ni Romualdez na ang Independent Commission for Infrastructure (ICI) ay walang nakitang pananagutan sa panig ng dating Speaker.

“Kung ating babalikan, mismong ICI ang naglabas sa kanilang imbestigasyon na wala silang mahanap na liability. Iyan ang malinaw na findings ng ICI nang dalhin ang records sa Office of the Ombudsman,” aniya.

Muli niyang iginiit na handa ang kanyang kliyente na sagutin ang mga paratang kapag pormal na siyang inatasan ng Ombudsman.

“Hindi po tumatakas sa kanyang pananagutan ang dating Speaker na harapin ang lahat ng ito.

Boluntaryo siyang bumaba bilang Speaker upang bigyang-daan ang imbestigasyon,” diin niya.

Sinabi ni Fajardo na nananatili si Romualdez sa bansa at patuloy na ginagampanan ang kanyang tungkulin bilang kinatawan ng Unang Distrito ng Leyte.

“Narito po siya. Abala siya bilang kinatawan ng Leyte at, siyempre, hindi siya tumatakas. Handa siyang harapin ang lahat kung mayroon mang sinasabing ebidensya,” aniya.

Sinabi niya na susunod si Romualdez sa mga proseso ng Tanggapan ng Ombudsman.

Gayunman, itinuro niya na wala pa ring isinasagawang preliminary investigation.

“Inaamin ng ating iginagalang na Ombudsman na hanggang ngayon ay wala pa ring preliminary investigation. At hindi pa siya napadadalhan ng subpoena ng Office of the Ombudsman,” diin ni Fajardo.

Sinabi niya na dapat mabigyan ang kanyang kliyente ng pagkakataong pormal na sagutin ang anumang reklamong ihahain laban sa kanya.

“Kami po ay nababahala rito dahil ang dating Speaker ay kailangang bigyan ng pagkakataon na pormal na sumagot sa mga paratang na ito bago magkaroon ng anumang konklusyon,” aniya.