Nagbigay ng update si Ruru Madrid sa kanyang tinamong hamstring injury kamakailan habang nasa taping ng “Lolong: Pangil ng Maynila.”

Ayon sa Facebook post ng Kapuso actor ay lumabas na ang resulta ng mga isinagawang test sa kanya at thankful siya na hindi ito malala.

“Maraming salamat po sa inyong pagmamahal at pag-aalala. Sa awa ng Diyos, lumabas na po ang resulta kanina — Grade 1 and 2 strain lang po, ibig sabihin ay 2-3 weeks lang ang recovery at may partial tear lang,” saad ni Ruru.

Pangako ng aktor na mabilis siyang magpapagaling para makabalik agad sa taping.

“To God be the glory! Magbabalik po ako nang mas mabilis! ,” aniya.

Matatandaang base sa naunang post ng aktor, isinugod siya sa ospital last Monday dahil bumigay ang binti niya habang ginagawa ang isang eksena sa nasabing action series.

Sa hospital ay kinumpirma ng mga doktor na nagkaroon siya ng hamstring injury at sumailalim agad sa MRI para malaman kung gaano kalaki ang pinsala.

“Hoping and praying na hindi ito Grade 3 strain, which means a full tear that could take weeks or even months to recover,” sey pa ng Lolong star.

Kaya naman thankful na rin siya na partial tear lang ang nangyari.