KAMPO HENERAL MIGUEL MALVAR, Lungsod ng Batangas–Sandamakmak na baril, bala at shabu ang nasamsam noong Sabado sa isang bahay sa Brgy. Lumbang na Matanda, Calaca City, Batangas, ayon kay Batangas police director P/Col. Geovanny Sibalo.

Hinalughog ang bahay ni alyas Theo, 45, sa tulong ng search warrant na inisyu ng Executive Judge ng Regional Trial Court Branch 9 ng Balayan, Batangas para sa paglabag sa RA 1059.

Tumambad sa mga pulis ang isang cal .38 revolver, cal .22 rifle, 9MM pistol, airgun, magazine para sa 9MM pistol, mga bala para sa cal 38; 29 na bala
para sa 9MM pistol at isang bala para sa shotgun. Hindi naman nahuli si alyas Theo, ayon sa report.

Nakumpiska rin ang humigit-kumulang 16 na gramo ng shabu na nagkakahalaga ng P108,800.