NAGPASIKLAB mula simula hanggang matapos ang Sarangani laban sa Cebu, 119-95, sa pagpapatuloy ng aksyon sa Manny Pacquiao presents 1xBet-MPBL 2025 Season sa Cuneta Astrodome sa Pasay.

Sa pangunguna nina Kyt Jimenez at King Destacamiento, kaagad umabante ang Sarangani, 35-19, sa first quarter upang itala ang kanilang unang back-to-back wins sa round-robin elimination phase ng 30-team tournament.

Si Jimenez, na siyang may hawak ng nag-iisang quadruple-double sa MPBL, ay nagtala ng 23 points, kabilang ang seven triples, 11 rebounds, 7 assists at 4 steals.

Nasungkit din ni Jimenez ang “Best Player of the Game” honors laban sa teammate na si Destacamiento, na may 21 points, 13 sa first period, 8 rebounds, 5 assists, 2 steals at 2 blocks.

Nakatuwang nila para sa Grippers ni coach John Kallos sina Lars Sunga (19 points, 5 rebounds, 3 assists); Martin Gozum (15 points, 2 assists); Jeymark Mallari (12 points, 7 assists, 2 rebounds); at Coy Alves (11 points, 8 rebounds, 4 steals, 2 assists).

Nalasap ng Cebu ang ikatlong dikit na kabiguan sa kabila ng 22-point, 8-rebound, 7-assist at 2-steal effort ni Jeco Bancale.

Nakakuha din ang Cebu ng 15 points at 5 rebounds mula kay Dolan Adlawan, 14 points, 8 rebounds at 6 assists mula kay Brylee Ivan Meca, 13 points, 5 rebounds, 5 assists at 3 steals mula kay Dennis Santos, and 10 points, 3 rebounds at 2 assists mula kay Jameson Hiro.