SINABI anoong Miyerkules ni House Assistant Majority Leader Zia Alonto Adiong ng Lanao del Sur na si Sen. Imee Marcos ay nagsisimula nang magtunog “mas miyembro ng depensa ni Vice President Sara Z. Duterte kaysa isang walang kinikilingang senador-hukom,” dahil sa paulit-ulit nitong pag-atake laban sa House of Representatives at patuloy na pagtatangkang pagdudahan ang proseso ng impeachment.

“Sa halip na maghanda para sa obhetibong pagsusuri ng ebidensya kapag nagsimula na ang impeachment trial, tila nakapuwesto na si Senator Imee Marcos sa panig ng isang kampo sa pamamagitan ng patuloy na pag-atake sa House, pagkuwestyon sa motibo nito, at pagpapalaganap ng mga naratibong pabor sa Bise Presidente,” ayon kay Alonto Adiong, na siyang namumuno sa House Committee on Suffrage and Electoral Reforms.

“Inaasahan sa isang senador-hukom na haharap sa impeachment trial nang may kahinahunan, pagiging patas, at pagpipigil. Ngunit ang nakikita ng publiko ay mga paulit-ulit na pahayag na mas kahawig ng mga paunang talking points ng depensa kaysa pagiging patas ng isang hukom,” dagdag pa niya.

Partikular na pinabulaanan ni Alonto Adiong ang pahayag ni Marcos na sadyang ipinagpapaliban ng Kamara ang pagsusumite ng impeachment records sa Senado.

“Ang Articles of Impeachment ay hindi isang isang-pahinang resolusyon na maaaring i-staple at iabot sa loob lamang ng isang hapon. Kabilang dito ang libu-libong pahina ng mga annex, transcript, sertipikasyon, sinumpaang salaysay, rekord pinansyal, at mga dokumentaryong ebidensya na kailangang makopya nang kumpleto at tama,” aniya.

“Hindi ito palabas na pampulitika. Isa itong prosesong konstitusyonal na nangangailangan ng katumpakan, kabuuan, at masusing pagbusisi. Mas gugustuhin ba ng senador ang kulang-kulang na rekord at depektibong pagsusumite, para lamang kwestiyunin din niya kalaunan ang integridad ng proseso?” dagdag niya.

Binigyang-diin ni Alonto Adiong na tinitiyak ng Kamara na magiging maayos, kumpleto, at lampas sa anumang legal na paghamon ang lahat ng rekord na ipapadala sa Senado.

“Hindi natin maaaring gawing mababaw ang due process para lamang masiyahan ang media sound bites o artipisyal na iskedyul sa pulitika,” aniya.

Pinasubalian din ng lider ng Kamara ang paulit-ulit na pahiwatig ni Marcos na ang mga mambabatas ay naimpluwensiyahan ng pera, proyekto, o pabor pulitikal sa pag-apruba ng reklamong impeachment.

“Sa loob ng ilang linggo, nakatutok ang mga batikos ni Senator Imee Marcos sa House of Representatives, kung saan basta-basta niyang ibinabato ang mga alegasyon ng suhulan, gantimpala, at maniobrang pulitikal kaugnay ng boto sa impeachment. Ngunit hanggang ngayon, wala siyang naipapakitang kahit isang affidavit, saksi, dokumento, o katanggap-tanggap na ebidensya upang patunayan ang mga paratang na ito,” ani Alonto Adiong.

“Madaling magbato ng paratang sa media. Mas mahirap patunayan iyon sa ilalim ng panunumpa,” dagdag niya.

Aniya, hindi makatarungan sa mga mambabatas at sa milyun-milyong Pilipinong kanilang kinakatawan na ipaliwanag ang napakalaking boto pabor sa impeachment bilang bunga lamang ng suhulan at pabor pulitikal.

“Ang basta-bastang pagsasabing higit 250 mambabatas ang tinalikuran ang kanilang konsensya at tungkuling konstitusyonal kapalit ng mga pabor ay lubhang iresponsable at isang insulto hindi lamang sa Kongreso kundi pati sa sambayanang Pilipino na naghalal sa amin,” ayon kay Alonto Adiong.

“Hindi isinasantabi ng Konstitusyon ang pananagutan kahit sa panahon ng krisis. Sa katunayan, mas nagiging mahalaga ang pananagutan kapag naghihirap ang mga Pilipino dahil bawat piso ng pondo ng bayan ay mas mahalaga,” dagdag pa niya.