NAGPAHAYAG ng matinding pagkabahala ang mga senador sa lumalalang problema ng bullying sa mga paaralan ng Pilipinas sa isang pagdinig ng Senate Committee on Basic Education ngayong Lunes.

Binanggit ng isa sa kanila ang umano’y kaso ng isang estudyanteng may kapansanan na nagpakamatay matapos diumano’y maranasan ang paulit-ulit na pambu-bully.

Nagpahayag ng matinding pag-aalala si Senador Rafael “Raffy” Tulfo sa patuloy na pagtaas ng mga kaso ng bullying sa bansa. Iginiit niya na sa kabila ng Anti-Bullying Act of 2013, nananatiling tinatawag na “bullying capital of the world” ang Pilipinas, kung saan isa sa bawat tatlong estudyanteng Pilipino ang nababalitang binu-bully araw-araw.

Binanggit niya ang datos na nagpapakita na tumaas ang mga kaso ng bullying mula 1,158 noong 2013 nang ipasa ang batas, hanggang mahigit 20,000 noong 2018.

Tinukoy ni Tulfo ang iniulat na kaso ng isang estudyanteng may kapansanan na umano’y tumalon mula sa ika-apat na palapag. Ayon sa ina ng bata, nakaranas na ito ng ilang insidente ng pambu-bully bago pa man ang trahedya.

“Ayon sa Initial police report, nabawian ng buhay ang bata dahil sa pagkahulog, pero ayon sa kanyang nanay, may previous incidents of bullying na malamang nag-udyok sa kanyang anak na tumalon,” ani Tulfo.

“Mr. Chair, nakakabahala na talaga ang sitwasyon. Despite the existence of the Anti-Bullying Act of 2013, We are faced with this reality,” dagdag pa niya.

Pinuna rin ni Tulfo ang kawalan ng sapat na aksyon mula sa DepEd at kinuwestyon kung saan nagkukulang ang kasalukuyang batas.

“Imbes na nakatulong ang batas, tumaas pa ang incidents ng pambu-bully. WE ARE UTTERLY FAILING. Ano ang ginagawa ng DEPED? Saan nagkukulang ang batas?,” tanong niya.

Iminungkahi ng senador ang ilang hakbang na nakaayon sa kanyang Senate Bill No. 441, kasama na ang mas mahigpit na parusa para sa mga paaralang hindi kumikilos sa mga reklamo ng bullying, paglalagay ng CCTV cameras sa loob ng paaralan, mandatory na pagsasanay para sa mga guro at magulang na may online na opsyon para sa mga OFW, mandatory na
counseling at sikolohikal na suporta, at isang epektibong sistema ng anonymous na pag-uulat. Iminungkahi rin niya ang pagbuo ng Memorandum of Agreement sa pagitan ng DepEd at DILG para sa mga roving police officers sa paligid ng mga paaralan, pati na rin ang pagpapalakas ng pagtuturo ng Good Manners and Right Conduct.

“This is not the first time we are discussing bullying and we already have an existing law. Pero bakit walang pagbabago at mas lumala pa ang sitwasyon? The time to answer these questions is now.

There is no better time to act, than NOW,” saad ni Tulfo.

Nanawagan din si Senador Erwin Tulfo sa kanyang mga katrabaho na suriin at palakasin ang Republic Act No. 10627, o ang Anti-Bullying Act of 2013, na binanggit na nananatiling laganap ang harassment at intimidasyon sa mga paaralan mahigit isang dekada matapos maisabatas ang batas.

Iginiit niya na ang proteksyon ng mga mag-aaral ang dapat palaging unahin, at ang ligtas na espasyo sa mga paaralan ay nagsisimula sa mas matibay na accountability at mas mahigpit na parusa para sa mga paulit-ulit na nambubully.

“Are the current measures under our Anti-Bullying Act of 2013 strong enough to deter bullying? Our goal is not to simply punish but to show young students that bullying has no place in our schools,” wika ni Tulfo.

Inaasahang susuriin pa ng pagdinig ang mga reporma upang mapalakas ang proteksyon ng mga estudyante sa ilalim ng kasalukuyang batas.