MULING tiniyak ng Senado ang kahandaan nitong gampanan ang tungkuling konstitusyonal bilang impeachment court sakaling maipasa ng House of Representatives ang articles of impeachment laban kay Bise Presidente Sara Duterte.

Ipinaliwanag ni Senate President Francis “Chiz” Escudero na bagamat nananatiling hypothetical ang mga diskusyon sa naturang usapin, handang handa na umano ang Senado na gawin ang proseso sa kabila ng masikip na iskedyul ng lehislatura at mga kaganapang pampulitika, kabilang ang nakatakdang nationwide rally ng Iglesia ni Cristo (INC) bilang suporta sa paninindigan ni Pangulong Ferdinand Marcos Jr. sa usapin ng napipintong impeachment trial.

“Maliwanag ang mensaheng INC, na sila ay sumusuporta sa Pangulong Marcos Jr., na ayaw na sanang patulan ang impeachment,” ani Escudero sa Kapihan sa Senado press conference.

Binigyang-diin ni Escudero ang papel ng Senado na itinalaga ng Konstitusyon, at nilinaw niya na ang mga kasalukuyang talakayan ay nakatuon sa mga procedural na usapin at hindi sumasalamin sa anumang pampulitikang paninindigan.

“Ang Senado ay handang gampanan ang aming tungkulin alinsunod sa Saligang Batas. Ang mga talakayan ay informasyonal lamang at hindi dapat ituring na pagsuporta o pagtutol sa reklamo,” ani Escudero.

Kapag naipasa na ang articles of impeachment, magko-convene ang Senado bilang impeachment court at manunumpa ang mga senador bilang mga hukom.

“Kapag na-transmit na sa amin ang articles of impeachment, magsisimula ang aming trabaho bilang impeachment court. Titiyakin naming patas at naaayon sa batas ang proseso,” dagdag niya.

Aminado si Escudero na isang hamon ang impeachment trial na posibleng magsabay sa kampanya para sa eleksyon sa Pebrero, ngunit iginiit niyang gagampanan ng Senado ang tungkulin nito ayon sa itinatadhana ng batas

“Bagamat mahigpit ang aming iskedyul dahil sa paparating na panahon ng kampanya, handa pa rin ang Senado na gawin ang aming tungkulin. Hindi namin maaaring talikuran ang aming responsibilidad,” paliwanag niya.

Magkakaroon ng deliberasyon ang Senado sa iskedyul ng paglilitis, kabilang ang posibilidad ng pagsasagawa ng mga sesyon kahit sa panahon ng pahinga. “Posible kaming magdaos ng mga sesyon kahit sa panahon ng pahinga, depende sa mga patakarang pagtitibayin. Ang mahalaga ay maisakatuparan ang aming mandato nang walang abala,” dagdag pa ni Escudero.

Tiniyak din ni Escudero na ang Senado ay mananatiling neutral at patas sa paglilitis. “Nakasaad sa aming mga patakaran ang pagiging neutral sa pulitika. Ang bawat miyembro ng Senado ay kailangang magtrabaho nang walang kinikilingan, at ito ang aming giya sa proseso ng impeachment,” aniya.

Binigyang-diin niya ang kahalagahan ng transparency sa proseso. “Ang aming trabaho ay nakasentro sa pagpapakita ng isang bukas at patas na paglilitis. Sisiguraduhin naming mananatili ang tiwala ng publiko sa buong proseso,” sabi ni Escudero.

Matatandaan na inanunsyo ng Iglesia ni Cristo (INC) ang plano nitong magdaos ng nationwide rally bilang pagtutol sa impeachment proceedings.

Sinabi ng INC na sinusuportahan nito ang paninindigan ni Pangulong Ferdinand “Bongbong” Marcos Jr. laban sa impeachment. Ayon sa isang tagapagsalita, “The Iglesia ni Cristo supports President Bongbong Marcos’s opinion against the impeachment pushed by certain sectors. The Iglesia ni Cristo is for peace; we do not want any form of unrest coming from any side.”

Ang INC ay kilala sa kanilang bloc voting at dati na ring sumuporta sa Marcos-Duterte tandem noong eleksyon ng 2022, na nagpapakita ng kanilang political alignment sa administrasyon.

Bagamat plano ng INC na magdaos ng rally, hindi nagbigay ng direktang komento si Escudero ukol dito at nanatiling nakatuon sa pagiging patas ng Senado.

“Ang aming tungkulin ay tiyaking patas at naaayon sa ebidensya ang proseso. Hindi dapat maimpluwensiyahan ng mga aktibidad sa labas ng Senado,” paliwanag niya.

Pinaalalahanan din niya ang kanyang mga kasamahan na umiwas sa anumang pahayag na maaaring makasira sa neutrality ng Senado. “Ang bawat hakbang ay nakatuon sa aming mandato, at hindi ito dapat maimpluwensiyahan ng anumang panlabas na opinyon,” dagdag niya.

Naghihintay ang Senado ng pormal na transmittal ng articles of impeachment mula sa House of Representatives. Kapag natanggap na, sisimulan ng mga senador ang deliberasyon sa procedural rules, evidence presentation, at scheduling upang matiyak ang maayos at patas na proseso.

“Ang Senado ay nananatiling nakatuon sa aming mandato kahit pa mahigpit ang aming iskedyul. Sisiguraduhin naming patas at makatarungan ang proseso,” pagtatapos ni Escudero.

Paliwanag din ni SP Escudero na hinaharap ng Senado ang hamon ng pagbabalanse ng legislative priorities nito sa constitutional responsibilities, habang pinangangalagaan ang neutrality nito sa gitna ng mga pampulitikang kilusan sa labas ng iba’t ibang grupo na may iba’t ibang paniniwala.