MULING magbubukas ang regular na sesyon ng Senado sa Lunes, Mayo 4, matapos ang isang buwang recess, kung saan inaasahang tatalakayin ng mga mambabatas ang malawak na hanay ng mga panukalang nakatuon sa reporma sa pamamahala, ekonomiya, at serbisyong panlipunan.

Nangunguna sa agenda ang mga prayoridad na panukalang inendorso ng Legislative-Executive Development Advisory Council, kabilang ang Anti-Political Dynasty Law na layong i-regulate ang sunod-sunod na panunungkulan ng magkakapamilya sa politika, at ang Party-List Reform Act na naglalayong mapabuti ang representasyon sa Mababang Kapulungan.

Kasama rin sa tatalakayin ang Independent People’s Commission Act at ang Right to Information Act, na kapwa naglalayong palakasin ang transparency, pananagutan, at pampublikong pagbabantay sa mga institusyon ng pamahalaan.

Inaasahan ding pagtuunan ng pansin ang mga panukalang may kinalaman sa ekonomiya at pananalapi. Kabilang dito ang mga amyenda sa Bank Secrecy Law, mga pagbabago sa Coconut Farmers and Industry Trust Fund Act upang mapahusay ang paggamit ng pondo, at ang pagsusuri sa Estate Tax Amnesty Program upang mapataas ang koleksyon ng buwis at mapagaan ang pagsunod ng mga nagbabayad nito.

Sa usaping panlipunan, tatalakayin ng mga senador ang mga panukalang amyenda sa Pantawid Pamilyang Pilipino Program o 4Ps Act upang mapahusay ang conditional cash transfer program ng pamahalaan. Kasama rin sa agenda ang Masustansyang Pagkain para sa Batang Pilipino program na tumutugon sa nutrisyon ng mga mag-aaral sa pampublikong paaralan, at ang Government Assistance to Students and Teachers in Private Education program na naglalayong palawakin ang suportang pang-edukasyon.

Prayoridad din ang mga panukala sa sektor ng enerhiya, agrikultura, at imprastraktura. Kabilang dito ang Waste-to-Energy Bill, mga amyenda sa Electric Power Industry Reform Act, mga pagbabago sa Rice Tariffication Law, at ang panukalang paglikha ng Department of Water Resources.

Samantala, sinabi ni Senate President Vicente Sotto III na handa ang Senado na umaksyon sa anumang Articles of Impeachment laban kay Vice President Sara Duterte sa sandaling ito ay maisumite sa kapulungan.

Tiniyak ni Sotto na kikilos ang Senado “forthwith” at “with dispatch” alinsunod sa Konstitusyon. Ayon sa kanya, sa oras na matanggap ang mga artikulo, agad niya itong ihaharap sa plenaryo at ire-refer sa Committee on Rules para sa angkop na aksyon, kabilang ang pagtatakda ng iskedyul at mga paunang proseso para sa posibleng impeachment trial.