PORMAL na kinilala ng Senado ang makasaysayang tagumpay ni Sofronio Vasquez, na kamakailan lamang ay naging unang Filipino at Asyano na nanalo sa The Voice USA.

Ang pagkapanalo ni Vazquez sa ika-26 na season ng kumpetisyon ay nagdulot ng matinding karangalan sa Pilipinas at sa pandaigdigang Filipino community.

Sa plenary session ng Senado, isang resolusyon ang nagkakaisang pinagtibay—ang Senate Resolution No. 1259 na inihain ni Senator Joel Villanueva, kasama ang kaugnay na mga resolusyon mula kay Senator Imee Marcos at Senate President Pro Tempore Jinggoy Estrada. Layunin ng mga resolusyong ito na parangalan ang tagumpay ni Vazquez bilang patunay ng husay ng mga Pilipino.

Si Vasquez, na nagmula sa Misamis Oriental, Northern Mindanao, at kasalukuyang nakatira sa Utica, New York, ay nanalo sa prestihiyosong kumpetisyon noong Disyembre 10, 2024, matapos makuha ang pinakamataas na boto mula sa mga manonood.

Ang kanyang tagumpay ay nagbigay din ng makasaysayang tagumpay para sa kanyang coach na si Michael Bublé, na nakuha ang kanyang unang panalo bilang mentor sa programa.

“His exceptional talent and heartfelt performance throughout the season showcased the remarkable prowess of Filipino singers, proving his well-deserved win,” pahayag ni Senator Villanueva.

Dagdag naman ni Senate President Pro Tempore Jinggoy Estrada, ang tagumpay ni Vazquez ay simbolo ng tiyaga at katatagan, na nagbibigay inspirasyon sa mga Pilipino na abutin ang kanilang mga pangarap.

Ang The Voice USA ay isang pandaigdigang kinikilalang plataporma para sa mga nagnanais na ipakita ang kanilang talento sa pagkanta. Sa kanyang blind auditions, hinangaan si Vazquez ng lahat ng apat na hurado, na naging dahilan upang maging isang four-chair turner. Pinili niyang sumali sa koponan ni Bublé, isang Grammy-winning artist, na nagbunga ng kanyang makasaysayang panalo.

Ipinahayag ng mga senador ang kanilang pagmamalaki sa nakamit ni Vasquez, binibigyang-diin ang kahalagahan ng kanyang tagumpay sa pagbibigay-inspirasyon sa mga Pilipino at pagpapakita ng talento ng bansa sa pandaigdigang entablado.