𝗦𝗔 𝗻𝗮𝗹𝗮𝗹𝗮𝗽𝗶𝘁 𝗻𝗮 𝗽𝗮𝗴𝗱𝗶𝗻𝗶𝗴 𝗻𝗴 𝗛𝗼𝘂𝘀𝗲 𝗻𝗴 𝗖𝗼𝗺𝗺𝗶𝘁𝘁𝗲𝗲 𝗼𝗻 𝗠𝗲𝘁𝗿𝗼 𝗠𝗮𝗻𝗶𝗹𝗮 𝗗𝗲𝘃𝗲𝗹𝗼𝗽𝗺𝗲𝗻𝘁, t𝘂𝘁𝘂𝗺𝗯𝘂𝗸𝗶𝗻 𝗻𝗴 c𝗵𝗮𝗶𝗿𝗺𝗮𝗻 𝗻𝗶𝘁𝗼 𝗻𝗮 𝘀𝗶 𝗠𝗮𝗻𝗶𝗹𝗮 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗹𝗮𝗻𝗱𝗼 “𝗖𝗥𝗩” 𝗠. 𝗩𝗮𝗹𝗲𝗿𝗶𝗮𝗻𝗼 𝗮𝗻𝗴 𝗺𝗴𝗮 𝘀𝗼𝗹𝘂𝘀𝘆𝗼𝗻𝗴 𝗸𝗮𝗶𝗹𝗮𝗻𝗴𝗮𝗻𝗴 𝗶𝗽𝗮𝘁𝘂𝗽𝗮𝗱 𝗻𝗴 𝗺𝗴𝗮 𝗮𝗵𝗲𝗻𝘀𝗶𝘆𝗮 𝗻𝗴 𝗽𝗮𝗺𝗮𝗵𝗮𝗹𝗮𝗮𝗻 𝘂𝗽𝗮𝗻𝗴 𝗵𝗶𝗻𝗱𝗶 𝗻𝗮 𝗺𝘂𝗹𝗶𝗻𝗴 𝗺𝗮𝘂𝗹𝗶𝘁 𝗮𝗻𝗴 𝗻𝗮𝗻𝗴𝘆𝗮𝗿𝗶𝗻𝗴 𝗽𝗮𝗴𝗯𝗮𝗵𝗮 𝘀𝗮 𝗠𝗲𝘁𝗿𝗼 𝗠𝗮𝗻𝗶𝗹𝗮 𝘀𝗮 𝗸𝗮𝘀𝗮𝗴𝘀𝗮𝗴𝗮𝗻 𝗻𝗴 𝗽𝗮𝗻𝗮𝗻𝗮𝗹𝗮𝗻𝘁𝗮 𝗻𝗴 𝘀𝘂𝗽𝗲𝗿 𝘁𝘆𝗽𝗵𝗼𝗼𝗻 𝗖𝗮𝗿𝗶𝗻𝗮.

Ayon kay Valeriano, ang isa sa mga paksang tatalakayin ng kaniyang komite ay ang paghahanap ng mga epektibong solusyon upang resolbahin ang problema ng matinding pagbaha sa Metro Manila sa tuwing magkakaroon ng bagyo at malakas na pag-ulan.

Paliwanag ni Valeriano, ang isa sa mga solusyon na nakikita nito patungkol sa teribleng pagbaha sa Kalakhang Maynila ay ang pagkakaroon ng “catch basin” sa mga estratehikong lugar katulad sa Bonifacio Global City (BGC) kung saan hindi naapektuhan ng matinding pagbaha ang nasabing lugar.

Sinabi pa ni Valeriano na isa rin sa tutumbukin ng kanilang pagdinig “in aid of legislation” ay ang flood control project ng Department of Public Works and Highways (DPWH). Sa kabila ng napakalaking budget ng ahensiya ngayong taon at sa 2025 ay bigo pa rin umano ang DPWH na epektibong maipatupad ang naturang proyekto para maiwasan ang mga pagbaha sa iba’t-ibang lugar sa Metro Manila.

Binigyang diin ng kongresista na kailangang ipaliwanag ng DPWH kung kamusta na ang kanilang flood control project at kung papaano nila ginastusan ang nasabing proyekto. Maging si Pangulong Bongbong Marcos, Jr. ay nagalit na rin dahil sa kabila ng malaking budget ng DPWH ay mistulang walang naging pakinabang ang flood control project nito sa kasagsagan ng bagyo.

“Ang isa sa mga pag-uusapan namin ay yung pagkakaroon ng catch basin sa ilang lugar sa Metro Manila kagaya duon sa BGC pati na rin ang control project ng DPWH. Ang laki ng pondo nila, the question is. Saan nila dadalhin iyon? Kailangan nilang magpaliwanag,” ayon kay Valeriano.