HIHINTAYIN muna ng Kamara de Representantes ang pormal na aksyon ng Senado hinggil sa panukalang 19-araw na impeachment calendar bago ito magbigay ng komento, pahayag ni Deputy Speaker David “Jay-jay” Suarez ng Quezon.

Tinutukoy ni Suarez ang mungkahi ni Senate Majority Leader Francis Tolentino, na nagsabing posibleng matapos ang impeachment trial laban kay Vice President Sara Duterte sa loob ng 19 session days.

Gayunpaman, ang nasabing panukala ay hindi pa naisasama sa kalendaryo ng plenaryo at hindi pa rin pinagtibay bilang opisyal na resolusyon ng Senado.

“Well, I have not seen the impeachment calendar. I think it’s a mere proposal,” ayon kay Suarez sa isang ambush interview sa media.

“Not until may makita tayong concrete from the Senate, I think they will be having their session today (Monday). Siguro saka na lang po kami mag-comment on that,” dagdag pa ng mambabatas.

Ayon kay Suarez, ilang senador na rin ang nagpahayag na hanggang hindi pa ito pormal na pinag-uusapan at pinagtitibay sa plenaryo, ito’y nananatiling hindi opisyal.

“Kasi tulad nga lang ng sinabi ng ibang mga senador, habang hindi pa ito formally nilalagay sa plenary at walang action,” saad pa ni Suarez. “So, those are mere pieces of paper only.”

Natanong din si Suarez kung babawasan ang bilang ng Articles of Impeachment laban sa Pangalawang Pangulo, subalit tumanggi itong magkomento bilang hindi miyembro ng House prosecution panel. Gayunman, iginiit niya ang unang paninindigan ng Kamara.

“Well, I can’t speak on behalf of the prosecutors but we signed the Articles of Impeachment, and we identified seven articles,” saad pa ni Suarez.

Binigyang-diin din ng kongresista na ang Kamara ay magbibigay lamang ng tugon kapag may malinaw at institusyonal na hakbang na ang Senado bilang impeachment court.

“So again, until such time na may concrete recommendation or action ‘yung Senate once they convene as an impeachment court, saka na lang po makakapag-respond ‘yung House,” saad ni Suarez.