INILUNGSAD ni Pangulong Ferdinand “Bongbong” Marcos Jr. katuwang ang Kamara de Representantes, sa pamumuno ni Speaker Ferdinand Martin Romualdez, at Social Welfare Secretary Rex Gatchalian ang Tabang Bikol, Tindog Oragon relief initiative kung saan halos P750 milyong halaga ng financial assistance at 24 na trak na puno ng relief goods ang ipamimigay sa mahigit 150,000 benepisyaryo sa Bicol region na sinalanta ng magkakasunod na bagyo, at ang huli ay ang super typhoon Pepito.

Ang programa, kung saan si Speaker Romualdez ang pangunahing tagapagtayugod, ay naglalayong suportahan ang mga nasalantang komunidad sa Camarines Norte, Camarines Sur at Albay upang agad na makabangon mula sa hagupit ng mga bagyong Kristine, Carina at Pepito.

“Ito ang direktiba ng ating mahal na Pangulong Marcos, ang tulungan ang mga nasalanta ng bagyo sa Bicol. This initiative is our way of showing that we stand shoulder-to-shoulder with our kababayans in Bicol during these challenging times,” ani Speaker Romualdez.

“Ang Tabang Bikol ay hindi lamang tulong pinansyal; ito’y simbolo ng malasakit at pagkakaisa ng sambayanang Pilipino,” dagdag pa ng lider ng mahigit 300 kinatawan ng Kamara.

Ang pagtulong ay nahahati sa tatlong pangunahing aktibidad: ang pamimigay ng financial assistance, pagsasagawa ng mini-Bagong Pilipinas Serbisyo Fair (BPSF) at ang distribusyon ng relief goods.

Ayon kay House Deputy Secretary General Sofonias “Ponyong” P. Gabonada, ang inisyatiba ay sinusugan din ni House appropriations committee chairman Zaldy Co – na nagmula sa Bicol at kumakatawan sa pangako ng Kamara na isang “holistic and sustainable recovery” na tutugon hindi lamang sa kasalukuyang pangangailangan.

Sinabi ni Gabonada na ang Department of Social Welfare and Development (DSWD) ang mangunguna sa pamamahagi ng financial aid sa ilalim ng Assistance to Individuals in Crisis Situations (AICS) program nito simula sa Nobyembre 18.

Ang mini-BPSF ay ilulungsad naman sa Nobyembre 21 at magbibigay ng iba’t ibang serbisyo mula sa mga ahensya ng gobyerno, ayon kay Gabonada.

Sabi ni Gabonada ang mga aktibidad ay magkakasabay na isasagawa sa iba’t ibang lugar, kasama ang Jessie Robredo Coliseum sa Naga City, Ka-Fuerte Sports Complex sa Pili at BUPC Gymnasium sa Polangui. Inaasahan na tig-10,000 ang benepisyaryo sa bawat lokasyon.

Iginiit ni Speaker Romualdez ang kahalagahan na sabayan ang pamimigay ng financial assistance ng serbisyong ibinibigay ng iba’t ibang ahensya ng gobyerno upang mas maging mabilis ang pagbangon ng mga nasalanta.

“Hindi lamang ito pantawid sa ngayon, kundi hakbang tungo sa mas maayos na kinabukasan. Mahalaga na magkaisa ang lahat – pamahalaan, pribadong sektor at bawat Pilipino – upang mapanumbalik ang sigla ng ating mga komunidad,” sabi ni Speaker Romualdez.

Isang mahalagang aspeto ng inisyatiba ay ang pamimigay ng relief goods na tinipon mula sa mga donation drive, ayon kay Speaker Romualdez.

Ang relief goods ay ikinarga sa mga trak at aalis sa Lunes, Nobyembre 18, mula sa Kamara de Representantes.

Kasama sa mga donasyong ipadadala sa mga nasalanta ay sako-sakong bigas at produktong de lata mula sa iba’t ibang grupo, gaya ng Tingog Party-list, PHILRECA, National Irrigation Administration (NIA) at mula sa pribadong sektor.

Ang pagpupunyagi ni Speaker Romualdez upang matulungan ang mga nasalanta ay bunsod ng kanyang naranasan nang manalasa ang super typhoon Yolanda noong 2013.

Sa Nobyembre 21 ay isasagawa ang ceremonial turnover ng mga relief goods sa mini-BPSF event sa Naga City, Pili at Polangui. Ang pagsasamang ito ay isang pagpapalakas ng mensahe ng pagkakaisa at pagiging matatag sa mga apektadong lugar.

“Tabang Bikol, Tindog Oragon reflects the compassion, resilience, and unity of the Filipino spirit,” sabi ni Gabonada.

Ang mga benepisyaryo ng programang ito ay mga pamilya na nasalanta ng mga nagdaang bagyo, karamihan ay nawalan ng tahanan at kabuhayan.

“Ang ating pagkakaisa ay patunay na kaya nating bumangon mula sa kahit anong unos. Magtulungan tayo para sa mas maliwanag na kinabukasan,” dagdag pa ni Speaker Romualdez.