PATULOY na nasa top 3 sina Filipino taekwondo jins Jocel Ninobla at Rodolfo Reyes Jr. sa World Poomsae Rankings ngayong buwan.

Pinatatag ni Ninobla ang kanyang hawak sa ikatlong puwesto sa female under-30 category ng recognized poomsae category, habang tangan rin ni Reyes ang naturang posisyon sa male side.

May naitalang 65 points, nakadikit si Ninobla kina top-ranked Eva Sandersen ng Denmark (191.50) at Paula Fregroso ng Mexico (73.46).

Hinahabol naman ni Reyes, na may 55.93 points, sina Joel Van Der Weide ng The Netherlands (103.56) at Ryan Real ng United States (84).

Idedepensa nina Ninobla at Reyes ang kanilang gold medals sa 31st Southeast Asian Games sa Mayo.

Umakyat naman si Rinna Babanto ng 13 puwesto sa No. 245, habang umangat rin si Aidaine Krishia Laxa sa rankings sa 312th place mula sa dating 318th.

Si Patrick Perez naman ay umusad ng siyam na puwesto sa No. 275.

Sa freestyle poomsae, napanatili ni Kobe Macario ang kanyang No. 3 ranking sa male over-17 category na may 38.27 points, habng bumaba naman ng isang puwesto ang katropang si Darius

Venerable sa pang-lima na may 31.20.

Hawak pa rin ni Nikki Oliva ang ikatlong puwesto sa female over-17 category na may 32.79 points.