NAGLAGARE ang Thai actor na si Nattapol Diloknawarit o Max sa pocket interview at red carpet premiere ng kauna-unahan niyang Pinoy movie na Kuman Thong nitong Lunes.

Ito ang ikalawang pagbisita ni Max sa Pilipinas matapos dumalo sa Altogether in Me fan meet kasama ang screen partner na si Tul Pakorn noong April, 2018.

Sa pocket interview na ginanap sa Botejyu resto sa SM North EDSA, inamin ni Max na noong una ay wala siyang kaide-ideya na sikat palang personalidad sa bansa si Xian Lim, direktor at scriptwriter ng Kuman Thong, nang mag-shoot sila ng horror movie sa Thailand.

Pero aware raw siya na kaibigan ito ng Thai singer na si Lydia Sarunrat Deane, na nakagawa na ng music video kasama ni Xian.

Aniya, nalaman lang niya na sikat dito ang aktor/direktor mula sa co-star niyang child actress na si Althea Ruedas.

“Althea talked to me, ‘You know him? He’s very famous in the Philippines.’ I haven’t met him before but he knows some of our friends, too,” kwento ng 30- year-old na si Max.

Malaki ang pasasalamat ng Thai actor kay Xian na aniya ay “very kind person.” “He knows what he’s doing, you know. Every time that I talked to him, he would send a picture. He said, ‘Max, it should be like this, like this,’ and I loved that because I knew what my director wanted me to do. So, yeah, it’s made clear and the movie goes so well,” papuri ni Max kay Direk Xian.

Para sa mga hindi nakakaalam, si Max ay naging host ng late-night Thai variety show sa Channel5 bago nag-artista. Ang una niyang acting project ay ang series na Bad Romance (2016).

Sa ilalim ng pangangalaga ng TV Thunder, ang ilan pang proyektong nagawa ni Max ay ang Manner of Death (2020), Together with Me (2017), Liar (2023) at Bangkok Love Stories: Innocence (2018).

Samantala, bukod kay Max, dumalo rin siyempre sa red carpet premiere ang co-stars niyang sina Althea, Emman Esquivel at Cindy Miranda. Naroon din si Direk Xian na kasamang dumating ang girlfriend at Kuman Thong co-writer niyang si Iris Lee.

Mula sa Viva Films, showing na ang Kuman Thong ngayong Miyerkules, July 3, sa mga sinehan nationwide.