DEDO ang 58-anyos na tsuper nang barilin ng malapitan ng isa sa dalawang suspek na sakay ng motorsiklo Lunes ng hapon sa Malabon City.

Todas kaagad ang biktimang si Benjamin Codilan, residente ng Block 24, Lot 24, Brgy. NBBS, Navotas City sanhi ng tinamong dalawang tama ng bala sa mukha habang mabilis na tumakas ang mga suspek patungong C-4 Road sa Navotas City.

Lumabas sa pagsisiyasat ng mga tauhan ni Malabon Police Chief P/Col. Jay Baybayan na naglalakad sa kahabaan ng Pampano St. dakong alas-12:26 ng hapon ang biktima nang sundan ng dalawang lalaking sakay ng isang itim na motorsiklong Honda Beat.

Nang lampasan ng mga suspek ang biktima sa bahagi ng Block 49, bumaba ang naka-angkas at binaril ng dalawang ulit ang kanilang target na kaagad nasawi.

Nagsagawa naman kaagad ng follow-up operation ang mga operatiba ng Malabon Police Sub-Station-5 subalit bigo na silang mahabol ang mga suspek habang inaalam pa ang motibo sa pamamaslang.

Nakuha sa lugar na pinangyarihan ng krimen ang dalawang basyo ng bala ng hindi pa batid na kalibre ng baril na isasailalim sa ballistic examination.