𝗞𝗜𝗡𝗔𝗦𝗔𝗡𝗚𝗞𝗔𝗣𝗔𝗡 𝗹𝗮𝗺𝗮𝗻𝗴 𝗻𝗶𝗻𝗮 𝗱𝗮𝘁𝗶𝗻𝗴 𝗣𝗮𝗻𝗴𝘂𝗹𝗼𝗻𝗴 𝗥𝗼𝗱𝗿𝗶𝗴𝗼 𝗥𝗼𝗮 𝗗𝘂𝘁𝗲𝗿𝘁𝗲 𝗮𝘁 𝗦𝗲𝗻. 𝗥𝗼𝗻𝗮𝗹𝗱 “𝗕𝗮𝘁𝗼” 𝗗𝗲𝗹𝗮 𝗥𝗼𝘀𝗮 𝗻𝗮 𝗱𝗮𝘁𝗶𝗻𝗴 𝗣𝗵𝗶𝗹𝗶𝗽𝗽𝗶𝗻𝗲 𝗡𝗮𝘁𝗶𝗼𝗻𝗮𝗹 𝗣𝗼𝗹𝗶𝗰𝗲 (𝗣𝗡𝗣) 𝗖𝗵𝗶𝗲𝗳 𝗮𝗻𝗴 “𝘄𝗮𝗿-𝗼𝗻-𝗱𝗿𝘂𝗴𝘀” 𝗰𝗮𝗺𝗽𝗮𝗶𝗴𝗻 𝗽𝗮𝗿𝗮 𝗽𝗮𝘁𝗮𝗵𝗶𝗺𝗶𝗸𝗶𝗻 𝗮𝗻𝗴 𝗺𝗴𝗮 𝗸𝗮𝗹𝗮𝗯𝗮𝗻 𝗼 𝗸𝗮𝗿𝗶𝗯𝗮𝗹 𝘀𝗮 𝗽𝗼𝗹𝗶𝘁𝗶𝗸𝗮 𝗻𝗴 𝗱𝗮𝘁𝗶𝗻𝗴 𝗣𝘂𝗻𝗼𝗻𝗴 𝗘𝗵𝗲𝗸𝘂𝘁𝗶𝗯𝗼 𝘀𝗮 𝗽𝗮𝗺𝗮𝗺𝗮𝗴𝗶𝘁𝗮𝗻 𝗻𝗴 𝗽𝗮𝗴𝗹𝗶𝗸𝗶𝗱𝗮 𝘀𝗮 𝗺𝗴𝗮 𝗶𝘁𝗼.

Ito ang isiniwat ni dating Iloilo City Mayor Jed Patrick Mabilog sa imbestigasyon ng House Quad Committee na ang madugo at marahas na war-against-drugs campaign na pumatay ng libo-libong inosenteng sibilyan ay hindi lamang isang payak na “anti-drugs campaign”. Bagkos, ginagamit lamang umano ito bilang front para likidahin o itumba ang mga potensiyal na karibal sa politika ng dating Pangulo.

Binigyang diin ni Mabilog sa kaniyang “opening statement” na lantarang kinasangkapan ng nakalipas na administrasyong Duterte ang mga law enforcement agencies gaya ng PNP na noo’y pinamumunuan ni Sen. Dela Rosa upang buweltahan ang mga kalaban sa politika. Habang mariing pinabulaanan ng dating mayor na siya ay sangkot sa illegal na droga sa kanilang lalawigan.

“Una po sa lahat I declare that I was not and never will be a drug protector. I don’t know personally nor did I benefit in any way from any illegal drug personality in Iloilo or anywhere else,” pahayag ni dating Mayor Mabilog.

Inakusahan din ni Mabilog si Duterte na ang inilabas nitong “narco-list” ay ginawa nitong “hit list” ng mga kalaban sa politika ng dating administrasyon.

“Pero kung titignan niyong mabuti. Isinama ang mga pangalan ng kalaban sa politika sa isang validated list ng mga personalities sa kasunod na PRRD List,” sabi pa ni Mabilog.