ALINSUNOD sa direktiba ni Pangulong Ferdinand R. Marcos Jr. na paigtingin ang kampanya laban sa transnational crime at tiyaking hindi magiging kanlungan ng mga dayuhang pugante ang Pilipinas, inaresto ng Bureau of Immigration (BI) ang dalawang Chinese nationals na hinahanap sa kanilang bansa dahil sa kasong pandaraya at ilegal na operasyon ng sugal. Nahuli rin ang isa pang Chinese national na lumabag sa batas sa pananatili sa bansa.

Kinilala ni Immigration Commissioner Joel Anthony Viado ang mga pugante na sina Jiang Yin, 31, at Li Chuang, 34, na inaresto ng mga operatiba ng BI Fugitive Search Unit (FSU) noong gabi ng Hunyo 16 sa Parañaque City.

Isinagawa ang operasyon sa pakikipagtulungan sa mga awtoridad ng Tsina na nagbigay ng impormasyon hinggil sa kanilang mga krimen.

Sa operasyon laban kay Li, natuklasan din ng mga ahente ang isa pang Chinese national na si Wang Weixin, 32, na lumabag sa batas ng imigrasyon dahil sa sobrang pananatili sa bansa at may aktibong Hold Departure Order.

Batay sa ulat ng mga awtoridad sa Tsina, sina Jiang at Li ay sangkot sa malakihang pandaraya at ilegal na online gambling gamit ang “Qianneng Wallet” application na pinatatakbo ng isang sindikato.

Itinuturing ang dalawa bilang mga pangunahing miyembro ng sindikato, na nagsilbing supervisor at marker na nagbibigay ng kredito sa pagsusugal at nag-aayos ng mga pustahan.

Ayon sa tala ng BI, si Jiang ay pumasok sa Pilipinas noong 2019 bilang pansamantalang bisita ngunit hindi na-renew ang kanyang bisa, dahilan upang siya ay maging overstaying alien.

Samantala, si Li ay nasa blacklist at watchlist ng Bureau bilang isang undesirable alien at pugante mula sa hustisya.

“Our message is clear: the Philippines will never be a refuge for foreign fugitives or members of transnational criminal syndicates,” ani Viado. “Those who exploit our immigration system to evade prosecution abroad or engage in illegal activities will be located, arrested, and deported. We will continue strengthening our cooperation with international law enforcement partners to ensure that criminals have no place to hide.”

Dinala ang tatlong Chinese nationals sa pasilidad ng BI matapos ang booking at dokumentasyon. Sina Jiang at Li ay sasailalim sa deportation proceedings bilang mga pugante at lumabag sa batas ng imigrasyon, habang si Wang ay haharap sa kaukulang kaso dahil sa overstaying.