PINASOK ng holdaper ang bahay sa San Fernando City, Pampanga at natangay ang P38,000, cellphone at mahahalagang mga dokumento noong Linggo.

Kinilala ni Pampanga police director Col. Eugene Marcelo ang mga biktima na sina Emerson Aquino, 28, at Raquel Lagman, 55.

Lumalabas sa pagsisiyasat na nasa bahay ng mga Lagman si Emerson para kunin kay Raquel ang bayad sa kanyang loan nang biglang pumasok ang suspek sa loob ng bahay at nagdeklara ng hold up.

Kinuha ng suspek ang sling bag ni Emerson na naglalaman ng hindi bababa sa P30,000 cash, mga dokumento at isang cellphone.

Kinuha rin kay Raquel ang P8,000 cash bago tumakas sakay ng motorsiklo papuntang Palawe Bacolor.