UMABOT sa P65,000 ang natangay ng dalawang armadong magnanakaw na pumasok sa sangay ng Alfamart sa Bgy. San Nicolas, San Pablo City, Laguna Martes ng madaling araw.

Ayon sa report ni PLt Franco Allan Reglos, hepe ng San Pablo Police, ang insidente ay naganap dakong 3:45 a.m. ng pasukin ang tindahan ng dalawang suspek.

Base sa pahayag ng dalawang crew na sina Jhon Marc Phillipe Pascua Ramos at Ryan Ytoc Villarin, dumating ang mga suspek na kapwa armado ng maikling baril, nakasuot ng asul na jacket at jogging pants at sakay ng motorsiklo.

Tinutukan ng mga suspek ng baril ang isang crew at nag-utos na buksan ang vault ng tindahan.

Ayon pa sa pulisya, agad inilagay ng mga suspek sa bitbit na bag ang pinagbentahan na P65,000 ng Alfarmart saka tumakas.

Agad nagsagawa ng follow-up operations ang San Pablo Police sa pamamagitan ng pagtingin sa CCTV upang matukoy at masundan ang mga suspek at maaresto.