GAPAN CITY–Timbog ang dalawang hinihinalang tulak ng ilegal na droga, kabilang ang isang tumalon sa tulay, sa operasyon na humantong sa pagkakasamsam ng P1.7 milyong halaga ng shabu at isang cal. 45 na baril noong Biyernes sa siyudad na ito.

Nangyari ang pag-aresto sa checkpoint Brgy. Vicente at Brgy. San Nicolas alas-6:00 ng umaga at ala-1:10 ng hapon, ayon sa report.

Kinilala ang mga nasakote na sina alyas Elon at alyas Henyo.

Nadakip si alyas Elon nang makuhanan ng 40 na gramo ng shabu at nagkakahalaga ng P272,000 matapos tumalon sa tulay ng Doña Josefa para makaiwas sa mga parak na titiklo sa kanya.

Nasakote ang isa pang suspek na umiwas sa checkpoint ng pulisya habang naka-motorsiklo.

Nakuha sa kanyang pag-iingat ang 250 na gramo ng shabu na nagkakahalaga ng P1.7 milyon at hindi lisensyadong cal. 45 pistol.