NAGKAROON ng book launching ang tatlong Batangueño authors noong Enero 7 sa provincial library, HELP Information Management Building, Capitol Compound, Batangas City.

Ni-launch nina Ian Gutierrez at Conrado Bugayong, kapwa mula sa Batangas City, ang “Sons of Batangas,” at “Snippets of Life” ni Ma. Eireen Conty Macaranas ng Lipa City.

Bagama’t pawang mga kasalukuyang naninirahan na sa ibang bansa, hindi ito naging hadlang para patuloy nilang maitaguyod ang diwa at aral ng paglingon sa kani-kanilang mga lugar na pinanggalingan.

Naisakatuparan ang event sa pangunguna ng Batangas Provincial Library at dumalo sina Vice Gov. Mark Leviste, Provincial Administrator Wilfredo Racelis na kinatawan ni Gov. Hermilando Mandanas, Secretary to the Sangguniang Panlalawigan Nelson Bayani at Provincial Librarian Alexander Lunar.

Dumalo rin ang mga kinatawan mula sa Department of Education–Batangas, Batangas History Society at mga librarians at tagapamahala ng mga silid aklatan mula sa iba’t ibang bayan, lungsod, paaralan at unibersidad sa probinsya.