CAMP OLIVAS, City of San Fernando, Pampanga — Arestado ang tatlong lalaki noong Linggo kasunod ng naudlot na pagdukot sa dalawang Koreano na nagresulta rin sa pagkakasamsam ng ilang baril at bala sa Clark Freeport Zone sa Mabalacat City, Pampanga.

Sa ulat kay Police Regional Office 3 (PRO3) director Brig. Gen. Ponce Rogelio Penones Jr., sinabi ng hepe ng Mabalacat City police na si Lt. Col. Efren David na nakatanggap sila ng tawag mula sa Clark Development Corporation (CDC) sa insidente umano’y pagdukot na kinasasangkutan ng dalawang Korean national.

Agad na nagsagawa ng beripikasyon ang mga rumespondeng opisyal at naglunsad ng hot pursuit operation na nagresulta sa pagkakaaresto sa mga suspek.

Nakumpiska mula sa tatlong suspek ang tatlong load cal. .9mm pistol at isang cal. 45 na baril, ilang magazine, mga bala, identification card, at isang itim na sasakyan na ginamit sa naudlot na kidnap-try.

Pinuri ni Penones ang mabilis na pagkilos ng mga operatiba at itinuro na ang operasyon ay sumasalamin sa bisa ng unang core pillar ni PNP chief Gen. Nicolas Torre III — mabilis at tumutugon sa serbisyo publiko na ipinatutupad sa Central Luzon.

“Ang insidenteng ito ay nagpapatunay na ang aming mabilis na oras ng pagtugon ay hindi lamang isang patakaran sa papel, ngunit isang konkretong pangako upang matiyak ang mabilis na aksyon ng pulisya kapag ang aming mga komunidad ay nasa panganib. Ang aming mga tauhan ay tumugon kaagad at tiyak, na pinipigilan ang karagdagang pinsala sa mga biktima at tinitiyak ang pag-aresto sa mga suspek,” ani Penones.

Binigyang-diin ng nangungunang pulis sa Central Luzon ang papel ng bagong tatag na Korean Help Desk sa pagbuo ng mas malapit na koordinasyon sa komunidad ng Korea sa rehiyon.

“Ang Korean Help Desk ay nagsisilbing tulay ng tiwala at pakikipagtulungan sa pagitan ng pulisya at ng ating mga Korean national na naninirahan at nagnenegosyo dito.

Ang partnership na ito ay nagpapatibay sa ating kapasidad na tumugon sa kanilang mga alalahanin at tinitiyak sa kanila na sila ay ligtas sa ilalim ng proteksyon ng ating pagpapatupad ng batas,” aniya.