CAMP VICENTE LIM, Canlubang, Laguna–Mahigit tatlong kilo ng shabu na nagkakahalaga ng mahigit P20.4 milyon at dalawang baril ang nakumpiska sa tatlong pinaghihinalaang tulak sa buy-bust ng Bacoor City police noong Linggo sa Brgy. Zapote 3, Bacoor City, Cavite.

Sa ulat ng Bacoor City police kay Police Regional Office (PRO)-4A chief P/BGen. Jack L. Wanky, pinangalanan ang tatlong nahuli na sina alyas Dave, Cho at Sha na naaresto dakong alas-4:00 ng umaga sa patnubay ng Philippine Drug Enforcement Agency (PDEA) agents.

Nabawi ng mga pulis ang 3 kilo ng shabu na tinatayang may standard price na P20,400.000.

Nakumpiska rin ang boodle money na ginamit sa buy bust, orange bag na may Chinese character, 1 black bag, Ford Explorer (NCO 1861), Honda Civic (WEW 402), .45 caliber pistol na may 3 bala at cal .38 revolver na may 2 bala.

Nabawi rin sa mga suspek ang isang ID na may pangalang Byeongjun Cho at isang cellphone, ayon sa report.