ITINALAGA si Colonel Hansel M. Marantan nitong Biyernes sa star-rank na posisyon sa punong-tanggapan ng Philippine National Police (PNP) sa Camp Crame matapos ang 11 buwang panunungkulan bilang direktor ng Davao City Police Office.

Kasapi ng Philippine National Police Academy “Kabalikat” Class of 1998, itinalaga si Col. Marantan ni PNP Chief General Nicolas D. Torre III bilang bagong punong tagapamahala ng PNP Peace Process and Development Center (PPDC), isang yunit na may mahalagang papel sa pinalakas na pagsusumikap ng PNP para makamit ang pangmatagalang kapayapaan sa bansa, lalo na sa Timog Pilipinas.

Kasama sa mga itinalaga sa kanilang bagong posisyon sa kautusan ni Gen. Torre nitong Biyernes ay sina:

Brigadier Gen. Marcelo B. Dayag, bilang bagong direktor ng PNP Training Service, kapalit ni Brig. Gen. Victor V. Arevalo na bagong-retirado;

Col. Francisco B. Ebreo, dating pinuno ng PPDC, na itinalaga bilang bagong Executive Officer ng Directorate for Research and Development;

Col. Rommel SA Batangan, dating deputy director ng PNP Anti-Cybercrime Group, na inilipat sa Police Regional Office-Negros Island Region;

Col. Romeo B. Desiderio, dating nasa Office of the Chief, PNP, na pinalitan si Batangan;

Col. Julius B. Guadamor, dating staff ng National Capital Region Police Office, na bagong deputy director ng Explosives and Ordnance/K-9 Group;

Col. Santiago D. Pascual, pinalitan mula sa Police Regional Office 9 bilang bagong deputy director for administration ng Criminal Investigation and Detection Group;

Brig. Gen. Adolfo T. Rafanan, itinalaga bilang bagong PNP Deputy Director for Research and Development.

Matapos matagumpay na pamunuan ni Col. Marantan ang mga peacekeeping at anti-criminality na operasyon sa Davao City at masiguro ang isang mapayapa at ‘trouble-free’ na halalan noong Mayo 12 sa lungsod na pinamumunuan ni Duterte, siya na ngayon ang mamumuno sa PNP-PPDC. Ang yunit na ito ang pangunahing responsable sa pagmamanman sa pagpapatupad ng mga kasunduan sa kapayapaan at mga kaugnay na batas sa bansa.

Nakikipagtulungan din ang PPDC sa Office of the Presidential Adviser on the Peace Process, mga Chairpersons ng Government Peace Negotiating Panels (GPNPs), at Armed Forces of the Philippines Peace Development Center (AFPPDC) para sa implementasyon ng peace process program. Pinagsasama-sama at ini-integrate nito ang mga input at rekomendasyon mula sa iba pang tanggapan at yunit ng PNP na kinakailangan upang maisulong ang peace process.

Kasama rin sa tungkulin ng yunit ang pagkoordina, pag-integrate, at pagpapalaganap ng implementasyon ng peace process agenda sa mga opisina ng PNP; pag-supervise sa mga tauhan ng PNP na nakatalaga sa mga Joint Security Committees/Teams na nilikha alinsunod sa Peace Agreement; paghahanda ng mga posisyon ng PNP hinggil sa mga isyu at diskurso tungkol sa peace process; at pagbuo ng mga plano at programa para sa post-conflict peacekeeping ng PNP.

Aktibo rin ang yunit sa patuloy na pagsisikap ng gobyerno na makamit ang pangmatagalang kapayapaan kasama ang Moro National Liberation Front, Communist Party of the Philippines/New People’s Army/National Democratic Front, at itinataguyod ang kaunlaran sa mga lugar na apektado ng hidwaan, bukod sa pagpapalaganap ng kapayapaan at pagiging sensitibo sa mga usapin ng salungatan sa peace-building at development.