NAARESTO ng Bureau of Immigration (BI) agents sa Daet, Camarines Norte ang Chinese na si Wu Zhishi dahil sa pagiging impostor na Pilipino na gumagamit ng mga pekeng dokumento na iniisyu ng gobyerno.

Ang operasyon ay isinagawa kasama ang Armed Forces of the Philippines, PAOCC at iba pang mga intelligence agency.

May expired na retiree visa si Wu at gumagamit ng pekeng Philippine IDs upang makakuha ng lisensya sa baril.

Siya ay ipinasa sa kustodiya ng PAOCC habang isinasagawa ang mga hakbang para sa kanyang deportasyon.

Binanggit ni BI Commissioner Joel Anthony Viado ang panganib sa pambansang seguridad dulot ng mga banyagang ilegal na gumagamit ng Philippine IDs at nanawagan ng mas mahigpit na patakaran sa pagbibigay ng mga dokumento ng gobyerno.