HUMIGIT-KUMULANG P330,763 kada araw ang naging gastos ng Senado sa impeachment trial ni Vice President Sara Duterte, at hindi ang sinasabing P25 milyon, ayon kay Senate President Sherwin Gatchalian.

“The claim that the impeachment trial costs the Senate ₱25 million a day is completely untrue,” aniya.

Paliwanag ni Gatchalian, ang P25 milyon ay gastos sa pagpapatakbo ng buong Senado. Kasama rito ang suweldo ng mga kawani at senador, maintenance, upa at utilities, na ginagastos ng Senado may impeachment trial man o wala.

Umabot sa P14,553,561.70 ang gastos na direktang may kinalaman sa paglilitis sa loob ng 44 na araw, ayon pa sa kanya.

Saklaw nito ang pagkain ng mga kawani tuwing pinahahaba ang sesyon, mga supply at overtime pay.

Kasama rin ang upa sa isang venue sa labas ng Senado para sa budget deliberations o pagtalakay sa pambansang budget. Halos lahat kasi ng silid ng Senado ay ginagamit sa paglilitis.

Lumabas ang paglilinaw matapos umanong sabihin ng tagapagsalita ni Duterte na si Paolo Panelo Jr. na umabot sa kabuuang P500 milyon ang nagastos ng Senado sa 20 araw ng paglilitis, batay sa tinatayang P25 milyon kada araw. Inilaan daw ang mga araw na iyon sa mga artikulong binawi kalaunan ng prosekusyon.

“The Constitution gives the Senate the sole power to try and decide all cases of impeachment. The Senate is fulfilling this duty as required by law,” giit ni Gatchalian.

“We extended our hours and devoted full days to the trial so it could proceed at an acceptable pace, without unduly disrupting the Senate’s legislative work and daily operations,” dagdag niya.

Noong Martes, pinayagan umano ng impeachment court ang mga taga-usig mula sa Kamara na bawiin ang tatlo sa apat na Articles of Impeachment laban kay Duterte. Ang impeachment court ay ang Senadong nagsisilbing hukuman sa paglilitis.

Natitira na lamang umano ang Article II, na may kinalaman sa mga paratang ng hindi maipaliwanag na yaman, hindi pagdedeklara ng ari-arian at hindi pagbitaw sa mga interes sa negosyo.