𝗕𝗜𝗦𝗟𝗜𝗚 𝗖𝗜𝗧𝗬 – 𝗧𝗶𝗻𝗮𝘁𝗮𝘆𝗮𝗻𝗴 𝗻𝗮𝘀𝗮 𝟵𝟬,𝟬𝟬𝟬 𝗯𝗲𝗻𝗲𝗳𝗶𝗰𝗶𝗮𝗿𝗶𝗲𝘀 𝗮𝗻𝗴 𝗻𝗮𝗯𝗶𝘆𝗮𝘆𝗮𝗮𝗻 𝗼 𝗻𝗮𝗯𝗮𝗵𝗮𝗴𝗶𝗻𝗮𝗻 𝗻𝗴 𝘁𝘂𝗹𝗼𝗻𝗴 𝗽𝗮𝘁𝘂𝗻𝗴𝗸𝗼𝗹 𝘀𝗮 𝗱𝗮𝗹𝗮𝘄𝗮𝗻𝗴 𝗮𝗿𝗮𝘄 𝗻𝗮 𝗕𝗮𝗴𝗼𝗻𝗴 𝗣𝗶𝗹𝗶𝗽𝗶𝗻𝗮𝘀 𝗦𝗲𝗿𝗯𝗶𝘀𝘆𝗼 𝗙𝗮𝗶𝗿 (𝗕𝗣𝗦𝗙) 𝗻𝗮 𝗶𝗱𝗶𝗻𝗮𝗼𝘀 𝘀𝗮 𝗗𝗲𝗹𝗮 𝗦𝗮𝗹𝗹𝗲 𝗝𝗼𝗵𝗻 𝗕𝗼𝘀𝗰𝗼 𝗖𝗼𝗹𝗹𝗲𝗴𝗲 𝘀𝗮 𝗦𝘂𝗿𝗶𝗴𝗮𝗼 𝗱𝗲𝗹 𝗦𝘂𝗿 𝗺𝗮𝘁𝗮𝗽𝗼𝘀 𝗮𝗻𝗴 𝗻𝗮𝗴𝗶𝗻𝗴 𝘁𝗮𝗴𝘂𝗺𝗽𝗮𝘆 𝗻𝗴 𝗶𝗻𝗶𝗹𝘂𝗻𝘀𝗮𝗱 𝗻𝗮 “𝗦𝗲𝗿𝗯𝗶𝘀𝘆𝗼 𝗖𝗮𝗿𝗮𝘃𝗮𝗻” 𝘀𝗮 𝗧𝗮𝗴𝘂𝗺 𝗖𝗶𝘁𝘆, 𝗗𝗮𝘃𝗮𝗼 𝗱𝗲𝗹 𝗡𝗼𝗿𝘁𝗲 𝗸𝗮𝗺𝗮𝗸𝗮𝗶𝗹𝗮𝗻.

Gaya ng naunang inilunsad na “Serbisyo Caravan” sa Tagum City, ganito rin ang naging sistema sa Bislig City kaugnay sa pagkakaloob ng pamahalaan ng tulong para sa libo-libong mamamayan na kasalukuyang nahaharap sa kahirapan sa pamamaraan ng BPSF – ang pilot program ni President Ferdinand “Bongbong” R. Marcos, Jr.

Nabatid na tinatayang P600 million sa pamamagitan ng government services ang ibinahagi para sa 90,000 benepisyaryo hindi lamang magmula sa lalawigan ng Surigao del Sur bagkos mula pa sa iba’t-ibang bahagi ng CARAGA Region.

Si House Speaker Ferdinand Martin Gomez Romualdez, na isa sa mga pangunahin o “major proponent” ng BPSF, ang kumatawan para kay President Marcos. Jr. habang sampung ahensiya ng pamahalaan ang nagsagawa ng tinatawag na “ceremonial turnover” ng labing-apat na programa para sa mga indigent Filipinos.

“Masaya po tayo’t nakaulayaw natin ang mga Surigaonon sa ating BPSF sa Surigao del Sur para ipaalala sa kanila at iparamdam na ang gobyerno na ni Pangulong Bongbong Marcos ang lumalapit sa kanila para magserbisyo, magpatupad ng iba’t-ibang programa at ilapit ang tulong sa mga nangangailangan,” pahayag ni Speaker Romualdez.

Sa kaniyang naging mensahe sa harap ng libo-libong residente at mamamayan ng Bislig City na dumalo sa nasabing event sinabi ng House Speaker na, “Ito ang sagot natin sa panawagan ni Pangulong Bongbong Marcos Jr. na ilapit ang pamahalaan sa mga mamamayan. Ngayon, ang pamahalaan na ang lumalapit sa mamamayan at naglilingkod sa abot ng aming makakaya”.

Binigyang diin pa ni Speaker Romualdez na mahal aniya ni President Marcos, Jr. ang Mindanao at ang patuloy na pagsasagawa ng BPSF sa iba’t-ibang lalawigan ng Mindanao ang matibay na pagpapatotoo ng Punong Ehekutibo na hindi niya aabandonahin ang mga mamamayan na nangangailangan ng tulong mula sa gobyerno.

“Mahal ni Pangulong Marcos Jr. ang Mindanao, at ang patuloy na pagsasagawa ng BPSF sa mga lalawigan dito ay patunay na hindi maiiwan sa programa’t serbisyo ang ating mga kapatid na taga-Mindanao,” dagdag ni Speaker Romualdez.