𝗣𝗔𝗚𝗞𝗔𝗧𝗔𝗣𝗢𝗦 𝗻𝗴 𝗺𝗮𝗵𝗮𝗯𝗮𝗻𝗴 𝘀𝗲𝘀𝘀𝗶𝗼𝗻 𝗯𝗿𝗲𝗮𝗸 𝗻𝗴 𝗞𝗮𝗺𝗮𝗿𝗮 𝗱𝗲 𝗥𝗲𝗽𝗿𝗲𝘀𝗲𝗻𝘁𝗮𝗻𝘁𝗲𝘀 b𝗮𝗹𝗶𝗸 𝗮𝗸𝘀𝗶𝘆𝗼𝗻 𝗻𝗮𝗺𝗮𝗻 𝘀𝗶 𝗛𝗼𝘂𝘀𝗲 𝗗𝗲𝗽𝘂𝘁𝘆 𝗦𝗽𝗲𝗮𝗸𝗲𝗿 𝗮𝘁 𝟱𝘁𝗵 𝗗𝗶𝘀𝘁. 𝗖𝗼𝗻𝗴. 𝗩𝗶𝗻𝗰𝗲𝗻𝘁 𝗙𝗿𝗮𝗻𝗰𝗼 “𝗗𝘂𝗸𝗲” 𝗗. 𝗙𝗿𝗮𝘀𝗰𝗼 𝘀𝗮 𝗽𝗮𝗴𝗯𝗶𝗯𝗶𝗴𝗮𝘆 𝗻𝗴 𝗱𝗲-𝗸𝗮𝗹𝗶𝗱𝗮𝗱 𝗻𝗮 𝘀𝗲𝗿𝗯𝗶𝘀𝘆𝗼 𝘀𝗮 𝗸𝗮𝗻𝗶𝘆𝗮𝗻𝗴 𝗺𝗴𝗮 𝗸𝗮𝗹𝗮𝗹𝗮𝘄𝗶𝗴𝗮𝗻 𝘀𝗮 𝗖𝗲𝗯𝘂 𝗖𝗶𝘁𝘆.

Ito ay matapos pangunahan ng House Deputy Speaker ang groundbreaking ceremony para sa pagpapatayo ng Liloan Children’s Hospital na matagal ng inaabangan ng mga residente ng Liloan, Cebu.

Ayon kay Frasco, sa pamamagitan ng Liloan Children’s Hospital, inaasahan ang pagkakaroon nito ng isang moderno at makabagong pedriatic health care system na malaki ang maitutulong para sa napakaraming kabataang may sakit kabilang na dito ang mga sanggol.

Paliwanag ng kongresista, kabilang din sa mga maipagmamalaki ng ipatatayong ospital ay ang pagkakaroon nito ng mga makabago at modernong kagamitan o hospital equipments gaya ng makikita sa mga malalaki at kilalang ospital sa bansa.

Sabi pa ni Frasco, ang ginanap na groundbreaking ceremony ay dinaluhan at sinaksihan ni Department of Health (DOH) Regional Director Jaime Bernadas kasama din sina Mayor Aljew Frasco, Mayor Jury Quino at mga opisyales ng Munisipalidad ng Liloan at Compostela.

Ayon pa sa mambabatas, ang pagpapatayo ng Liloan Children’s Hospital ay katuparan ng kaniyang pangarap na matagal na nitong inaasam kahit noong nanunungkulan pa siyang Mayor ng Liloan, Cebu noong taong 2007.

Sabi pa ni Frasco, ang kaniyang pangarap ay hindi nanatiling isang pangarap.

Sinikap aniyang maisakatuparan ang kanyang pangarap sa pamamagitan ng pagsulong nito ng House Bill No. 8274 na naglalayong magkaroon ng healthcare facility para sa mga bata ng Cebu City kasama na ang Visayas.