𝗜𝗧𝗜𝗡𝗨𝗧𝗨𝗟𝗔𝗞 𝗻𝗴 𝗵𝘂𝘀𝘁𝗼 𝗻𝗶 𝗢𝗙𝗪 𝗣𝗮𝗿𝘁𝘆 𝗟𝗶𝘀𝘁 𝗖𝗼𝗻𝗴. 𝗠𝗮𝗿𝗶𝘀𝘀𝗮 “𝗗𝗲𝗹 𝗠𝗮𝗿” 𝗣. 𝗠𝗮𝗴𝘀𝗶𝗻𝗼 𝗮𝗻𝗴 𝗽𝗮𝗴𝗸𝗮𝗸𝗮𝗿𝗼𝗼𝗻 𝗻𝗴 𝗺𝗮𝗹𝗮𝘄𝗮𝗸𝗮𝗻𝗴 𝗽𝗿𝗼𝗴𝗿𝗮𝗺𝗮 𝗽𝗮𝗿𝗮 𝘀𝗮 𝘂𝘀𝗮𝗽𝗶𝗻 𝗻𝗴 𝗺𝗲𝗻𝘁𝗮𝗹 𝗵𝗲𝗮𝗹𝘁𝗵 𝘀𝗮 𝗶𝗯𝗮’𝘁-𝗶𝗯𝗮𝗻𝗴 𝗣𝗵𝗶𝗹𝗶𝗽𝗽𝗶𝗻𝗲 𝗘𝗺𝗯𝗮𝘀𝘀𝘆 𝘀𝗮 𝗶𝗯𝗮𝗻𝗴 𝗯𝗮𝗻𝘀𝗮 𝗸𝗮𝘀𝗮𝗺𝗮 𝗻𝗮 𝗮𝗻𝗴 𝗺𝗴𝗮 𝗲𝗺𝗽𝗹𝗲𝘆𝗮𝗱𝗼 𝗻𝗴 𝗣𝗵𝗶𝗹𝗶𝗽𝗽𝗶𝗻𝗲 𝗳𝗼𝗿𝗲𝗶𝗴𝗻 𝗽𝗼𝘀𝘁𝘀 𝗽𝗮𝗿𝗮 𝗺𝗮𝘁𝘂𝗹𝘂𝗻𝗴𝗮𝗻 𝗻𝗶𝗹𝗮 𝗮𝗻𝗴 𝗺𝗴𝗮 𝗢𝘃𝗲𝗿𝘀𝗲𝗮𝘀 𝗙𝗶𝗹𝗶𝗽𝗶𝗻𝗼 𝗪𝗼𝗿𝗸𝗲𝗿𝘀 (𝗢𝗙𝗪𝘀) 𝗻𝗮 𝘀𝘂𝗺𝗮𝘀𝗮𝗶𝗹𝗮𝗹𝗶𝗺 𝘀𝗮 𝗺𝗲𝗻𝘁𝗮𝗹 𝗵𝗲𝗮𝗹𝘁𝗵 𝗽𝗿𝗼𝗯𝗹𝗲𝗺s.

Sa budget hearing ng House Committee on Appropriations para sa 2025 proposed national budget ng Department of Foreign Affairs (DFA), iginiit ni Magsino ang pagbabalangkas ng DFA ng isang programa para sa mga Philippine Embassy sa abroad kabilang na ang mga Philippine Consulate Offices para magkaroon sila ng sapat na kaalaman sa usapin ng mental health.

Paliwanag ni Magsino, layunin nito na matulungan ang mga OFWs o migrant workers na dumaranas ng matinding mental health problem o psychological problem dulot ng stress, depression o pangungulila sa kanilang pamilya at iba pang mga rason.

Inilahad din ni Magsino ang ginawa nitong pagbisita kamakailan sa Kingdom of Saudi Arabia, United Arab Emirates (UAE), Taiwan, Singapore at South Korea nuong nakaraang buwan ng Hunyo at Hulyo.

Nakita umano niya ang kahalagahan na maging “mental health responsive” ang tinatawag na foreign posts sa iba’t-ibang panig ng mundo para maging handa sa pagtugon sa kalagayan ng mga OFWs.

Sabi din ni Magsino sa budget hearing ng DFA na mismong ang mga kasapi ng Philippine community at mga leaders nito, kasama na ang mga empleyado ng consular offices ang naglatag ng nasabing issue patungkol sa nakakabahalang kaso ng mga OFWs na dumaranas ng mental health problem.

“When I visited several foreign posts to personally talk to our OFWs. I witnessed firsthand the dedication of our Embassy personnel despite limited manpower. Subalit, sa dami at bigat po ng mga kaso ng ating OFWs na inaayos ng ating foreign service personnel sa mga lugar na ito. Hindi maiiwasan na madama nila ang stress ng sitwasyon,” paliwanag ni Magsino.

Sa pagpapatuloy ng budget hearing ng DFA, itinanong din ni Magsino sa mga opisyal ng naturang ahensiya kung mayroon silang plano para magkaroon ng “mental health support” at kung nakapaloob din sa kanilang alokasyon para sa susunod na taon (2025) ang paglalaan ng kaukulang pondo para sa pagsusulong ng isang programa para sa usapin ng mental health.