KAMPO HENERAL MIGUEL MALVAR, Batangas–Apat na Chinese nationals na umano’y dinukot sa Pasay City ang nailigtas ng mga pulis sa bypass road sa Brgy. Balagtas, Batangas City.

Sa imbestigasyon, dinukot sa isang lugar sa Pasay ang mga nailigtas na sina Wang Lan Lai, 32; Wang Qing Feng, Nang Ze Cheng, 31; at Chen Wei Wei ng mga hindi nakikilalang kapwa nila Chinese at isinakay sa hindi kilalang sasakyan.

Natagpuan ni Jorson Daquipa Cabañeros, 31, security guard ng Toyota Motors pasado alas-3:45 ng umaga ang mga Tsino na naka-blindfold, may duct tape sa bibig at naka-zip-tied ang mga kamay.

Nakatakas umano sa kanilang abductors ang apat at humingi ng tulong sa mga duty security guard ng Toyota-Batangas.