PINATUNAYAN ni House Deputy Speaker at Cebu 5th Dist. Cong. Vincent Franco “Duke” D. Frasco ang pagiging “action-man” ng kanyang lalawigan matapos itong muling mamahagi ng tinatayang nasa P3 milyong cash assistance upang suportahan at tulungan ang masisipag na 1,000 Barangay workers sa bayan ng Sogod, Cebu.

Muling pinangunahan ng House Deputy Speaker ang pamamahagi at pagkakaloob ng tulong sa mahihirap na kababayan kasama na dito ang mga Cebuano.

Paliwanag ni Frasco na karapat-dapat lamang tulungan ang mga barangay workers sapagkat sa kabila ng kanilang kasipagan at pagpupunyagi para tuparin ang kanilang tungkulin ay maliit lamang ang kanilang kinikita. Aniya, nauubos ang kanilang sahod sa mga pangunahing pangangailangan ng kanilang pamilya o ang pang-araw araw na gastusin.

Sa pamamagitan ng personal fund ng kongresista, ipinamahagi nito ang cash assistance sa barangay workers. Bukod sa cash assistance, namigay din ai Frasco ng limang kilong bigas sa mga barangay workers.

“Nais natin ipakita sa mga barangay workers na hindi ko sila maaaring pabayaan. Andito po tayo upang sila’y tulungan, tayo ay naaawa sa kanila dahil sa kabila ng kanilang kasipagan at sakripisyo para gampanan ang kanilang tungkuin ay kulang ang kanilang kinikita. Kaya naririto tayo para sila ay ating tulungan,” sabi ni Frasco.