KAMPO MAJOR HENERAL LICERIO GERONIMO, Taytay, Rizal–Arestado ang tatlong suspek sa pangangalakal ng ilegal na droga sa buy-bust ng San Mateo police sa Brgy. Guitnang Bayan 1, San Mateo, Rizal noong Sabado na nagresulta rin sa pagsamsam ng P238,000 na halaga ng shabu.

Dalawa sa mga naaresto babae na kinilalang sina alyas Hanna, 27, at alyas Jenny, 39. Tricycle driver ang pangatlo na kinilalang si alyas Marjo, 48.

Narekober sa buy-bust ang 10 sachets na naglalaman ng 35 gramo ng shabu na nagkakahalaga ng P238,000.

Nasa pangangalaga ng San Mateo Custodial Facility ang mga naaresto at nahaharap sa kasong paglabag sa RA 9165 (Comprehensive Dangerous Drugs Act of 2002).