GAPAN CITY–Tumanggap ng P30,000 ang 47-anyos na lalaki matapos tanghaling pinakamatandang nagpatuli sa “Operation Libreng Tuli para sa Batang Gapan” ni Mayor Joy Pascual noong Biyernes.

Mahigit isang libo katao ang nakiisa sa libreng tuli na idinaos sa District IV congressional office ni Rep. Emerson Pascual mula alas-8:00 ng umaga hanggang alas-5:00 ng hapon.

“May kasamang libreng movie, libreng hotdog, libreng sago at gulaman, libreng photo booth, pati ice cream at libreng popcorn dito sa ating libreng patuli,” sabi ni Mayor Pascual.

Personal na ibinigay ni Pascual ang P30,000 na premyo sa 47-anyos na nagwagi na umamin na mayroon siyang walong anak mula sa una at pangalawang live-in partner.