NASABAT ng mga operatiba ng Philippine National Police (PNP) sa tulong ng Bureau of Customs (BOC) ang dalawang truck na may kargang tinatayang ₱15.7 milyon na halaga ng smuggled na sigarilyo sa Pigcawayan, Cotabato nitong Huwebes.

Anim na lalaki ang naaresto habang tumatawid sa Panatan Border Checkpoint sa bayan ng Pigcawayan dakong 1:30 ng hapon, sa isang anti-smuggling operation.

Ang dalawang sasakyan—isang kahel na Mitsubishi Fuso at isang asul na Mitsubishi Fuso—ay na-impound matapos matagpuang may lamang 400 kahon o 20,000 reams ng sigarilyong may brand na Fort at Berlin.

Nakilala ang anim na suspek sa kanilang mga alyas na “Karl,” “Joy,” “Mike,” “Rods,” “Antoy,” at “Roy.” Sila ay kasalukuyang nasa kustodiya ng Pigcawayan Municipal Police Station.

Isinagawa ang inventory ng mga nakumpiskang kontrabando sa mismong lugar ng operasyon sa presensya ng mga opisyal ng barangay at mga miyembro ng media upang matiyak ang transparency. Pormal itong isasalin sa Bureau of Customs para sa dokumentasyon at nararapat na disposisyon.

Mahaharap ang mga naarestong indibidwal sa mga kasong paglabag sa:

Republic Act No. 10863 o Customs Modernization and Tariff Act (CMTA),

Graphic Health Warning Law, at Republic Act No. 12022, na nagpapalakas sa depinisyon ng Agricultural Economic Sabotage.

Pinuri ni Acting PNP Chief Lt. Gen. Jose Melencio C. Nartatez Jr. ang mabilis na aksyon ng mga operatiba at ang kooperasyon ng BOC at mga lokal na opisyal sa matagumpay na operasyon.

Binigyang-diin din niya ang pangako ng PNP na protektahan ang kaligtasan ng publiko at ang ekonomiya laban sa mga kriminal na aktibidad.

“Magsilbi sanang babala ito sa lahat ng nagtatangkang iwasan ang batas. Hindi kukunsintihin ang smuggling, economic sabotage, at iba pang krimen. Sisiguraduhin ng PNP at mga katuwang na ahensya na mananagot ang mga lumalabag sa batas,” ani Nartatez.

Dagdag pa niya, ang matagumpay na operasyon ay patunay ng patuloy na dedikasyon ng PNP sa pagbabantay sa mga komunidad at interes ng ekonomiya ng bansa, habang pinangangalagaan ang transparency at accountability.