ISANG masuwerteng mananaya mula sa Santa Rosa, Laguna, ang nagwagi ng jackpot prize na nagkakahalaga ng P86.3 milyon sa Lotto 6/42 draw noong Sabado ng gabi, ayon sa anunsiyo ng Philippine Charity Sweepstakes Office (PCSO) nitong Linggo.

Ayon sa PCSO, ang winning ticket ay may kumbinasyong: 08-39-07-38-02-09.

Mayroon ang nanalo ng isang taon upang i-claim ang kanyang premyo sa pangunahing tanggapan ng PCSO sa Mandaluyong City. Kailangan niyang dalhin ang winning ticket at dalawang valid ID.

Ayon sa Tax Reform for Acceleration and Inclusion (TRAIN) law, ang mga panalong lampas P10,000 ay papatawan ng 20 porsiyentong buwis.

Maliban sa jackpot winner, may 50 mananaya na nanalo ng P24,000 bawat isa sa pamamagitan ng pagtama sa lima sa anim na winning numbers.

Samantala, may 1,965 mananaya ang makakatanggap ng P800 sa pagtama ng apat na numero, at 34,972 mananaya naman ang tatanggap ng P20 sa pagtama ng tatlong numero.

Ang Lotto 6/42 ay binobola tuwing Martes, Huwebes at Sabado.

PNA