IPINA-deport ng Bureau of Immigration (BI) ang Chinese fugitive na si Shi Chunfang, 40, na hinahanap ng mga awtoridad sa Tsina dahil sa kasong pagdukot.

Ang agarang deportasyon, na hiniling ng Embahada ng People’s Republic of China, ay isinagawa noong gabi ng 22 Disyembre. Si Shi ay sumakay sa eroplanong Xiamen Air patungong Jinjiang, kung saan siya agad na inaresto ng mga awtoridad ng Tsina.

Sa isang pormal na liham, nagpasalamat ang Embahada ng Tsina sa BI sa mabilis na pag-facilitate ng deportasyon ni Shi, na nagbigay-daan sa kanilang law enforcement na agad na makuha ang kustodiya at ipagpatuloy ang mga kasong kriminal laban sa kanya.

Si Shi ay naaresto ng mga operatiba ng BI noong 14 Disyembre sa isang tirahan sa Taytay, Rizal, matapos makumpirma na siya ay may warrant of arrest na inilabas noong 2024 ng Public Security Bureau ng Jinjiang City. Ipinaalam din ng Embahada na kanselado na ang kanyang pasaporte, dahilan upang siya ay maituring na undocumented alien sa ilalim ng batas ng imigrasyon ng Pilipinas.

Batay sa rekord, si Shi ay nasa ilalim ng blacklist order mula pa noong Enero at watchlist order noong Hulyo, matapos makatanggap ang BI ng impormasyon ukol sa kanyang mga krimen sa ibang bansa. Kasama niyang naaresto si Shuguang Fan, 37, na dati nang inatasang umalis sa bansa noong 2023 dahil sa matagal at hindi maipaliwanag na pananatili.

Ayon kay BI Commissioner Joel Anthony Viado, nakatanggap ang ahensya ng intelligence reports na nag-uugnay kay Shi sa isang pinaghihinalaang drug laboratory sa Rizal, dahilan upang maantala ang kanyang deportasyon.

“Tiniyak ng Bureau na nasunod ang due process at nakumpleto ang lahat ng koordinasyon sa mga kaukulang ahensya bago isinagawa ang deportasyon,” diin ni Viado.

Ipinaliwanag ni Viado na bagama’t una nang hiniling ang agarang deportasyon, pansamantalang ipinagpaliban ito upang makipag-ugnayan sa Department of Justice, Department of the Interior and Local Government, at Philippine National Police upang matukoy kung may pananagutang kriminal si Shi sa Pilipinas. Noong araw ng deportasyon, kinumpirma ng PNP na wala siyang nakabinbing kaso sa bansa, kaya’t tuluyan nang naisakatuparan ang deportasyon.

Bunga nito, isinama na ang pangalan ni Shi sa blacklist ng BI, na nagbabawal sa kanya na muling makapasok sa Pilipinas.