BINIGYANG-DIIN nitong Lunes ni House committee on higher and technical education chairperson Jude Acidre na ang anumang tangkang i-impeach si Pangulong Ferdinand “Bongbong” R. Marcos Jr. ay dapat na malinaw at matibay na nakasandig sa Konstitusyon, at nagbabala laban sa espekulasyon at mga naratibong inuudyukan ng pulitika.

Ipinunto ni Acidre na ang pag-impeach sa isang nakaupong Pangulo ay kailangang tumugon sa mahigpit na pamantayang konstitusyonal at ebidensiyal.

“Ang anumang hakbang para i-impeach ang isang nakaupong Pangulo ay dapat na matibay na nakabatay sa Konstitusyon at sinusuportahan ng malinaw, kapani-paniwala, at matibay na ebidensiya,” ani Acidre.

“Hindi ito dapat kailanman idinidikta ng tsismis, presyur sa pulitika, o ingay,” saad niya.

Dagdag pa niya na dapat laging kumilos ang Kamara nang may pagpipigil at pananagutang institusyonal, lalo na sa mga isyung may malalawak na implikasyon sa pamamahala.

“Sa huli, may tungkulin ang Kamara na kumilos nang may kahinahunan, katarungan, at paggalang sa ating mga institusyon,” ani Acidre. “Dapat nating laging unahin ang katatagan ng pamamahala at ang kapakanan ng sambayanang Pilipino kaysa sa pulitika.”

Ang mga pahayag ni Acidre ay ginawa sa gitna ng muling pag-uusap tungkol sa impeachment, kung saan muling iginiit ng mga miyembro ng Kamara na tanging mga reklamong may matibay na batayang konstitusyonal at maayos na naisumite lamang ang nararapat na bigyang opisyal na konsiderasyon.

Sinabi rin niya na sa kasalukuyan ay wala pang pormal na reklamong impeachment na naisumite o kahit na naikalat sa Kamara de Representantes.

“Sa puntong ito, napakahirap magkomento sa isang bagay na hindi pa naman namin nakikita o napag-aaralan,” ani Acidre.

“Sa pagkakaalam namin, wala pang pormal na reklamong impeachment na naisumite o naikalat sa Kamara,” dagdag niya.

Ayon pa kay Acidre, may pananagutan ang mga mambabatas na iwasan ang haka-haka at tumalakay lamang sa mga beripikadong dokumento at itinatag na mga proseso.

“Hangga’t walang aktuwal na dokumentong masusuri, mas maingat at responsable na magpigil muna sa pagbibigay ng komento kaysa mag-ispekula batay sa tsismis o mga ulat,” sinabi ni Acidre.

Binigyang-diin ng lider ng Kamara na ang impeachment ay isang pambihira at seryosong mekanismong konstitusyonal, at hindi isang kasangkapan para sa presyur o ingay sa pulitika.

“Ang impeachment ay isang napakaseryoso at pambihirang prosesong konstitusyonal. Hindi ito dapat binabalewala o ginagamit nang basta-basta,” ani Acidre.