ISUSULONG ni House Majority Leader at Ilocos Norte Rep. Ferdinand Alexander “Sandro” A. Marcos na pabilisin at patatagin ang disiplina sa pagtatrabaho ng Kamara de Representantes sa ilalim ng pamumuno ni Speaker Faustino “Bojie” G. Dy III sa muling pagbubukas ng sesyon nitong Lunes, kung saan 36 na natitirang prayoridad na panukala mula sa 48 Legislative-Executive Development Advisory Council (LEDAC) bills ay nasa pipeline pa.

Sinabi ni Marcos na layunin ng Kamara na manatiling nakahanay sa legislative agenda ni Pangulong Ferdinand “Bongbong” R. Marcos Jr., habang pinagtutuunan ng pansin ang mga repormang direktang nakaaapekto sa pagkain ng bawat pamilya, access sa serbisyong pangkalusugan, pangangailangan sa silid-aralan at proteksyong panlipunan—mga larangang tinukoy niyang “where public service becomes most tangible.”

“We’ve proven that the House can move quickly when we agree on the urgency and do the committee work properly. Now we need to sustain that momentum, be faithful to our timelines and keep the discussions grounded on policies that families can actually feel,” diin ni Marcos.

Binigyang-diin niya na sa loob ng 22 session days, naipasa ang 12 LEDAC measures, naihain ang 7,127 panukalang batas at 660 resolusyon hanggang Enero 15, 2026. Sa bilang na ito, 86 na panukala ang naaprubahan at 584 ang naproseso ng mga komite at plenaryo—patunay, aniya, ng masinsinang trabaho ng lehislatura sa simula ng bagong Kongreso.

“We will try our best to outdo what we have already accomplished so far. I am optimistic that the 20th Congress House of Representatives can rise up to the challenge and be more productive,” saad ni Marcos.

Kabilang sa 12 LEDAC measures na naipasa na sa ikatlo at huling pagbasa, binanggit ni Marcos ang mga reporma para punuan ang kakulangan sa governance at serbisyo, kabilang ang EPIRA amendments para palakasin ang kapangyarihan ng Energy Regulatory Commission sa oversight at proteksiyon ng konsyumer, waste-to-energy bill sa waste treatment technology, National Center for Geriatric Health, amendments sa Government Assistance to Students and Teachers in Private Education Act, Assistance to Individuals in Crisis Situations (AICS) Act, amendments sa National Building Code, Blue Economy Act, National Reintegration Bill, amendments sa Teachers Professionalization Act, extension ng estate tax amnesty period, Department of Water Resources bill, at amendments sa Bank Deposits Secrecy Law.

Dahil pending pa ang 36, sinabi ni Marcos na gagawing prayoridad ng Kamara ang LEDAC measures sa agrikultura, health, edukasyon at social welfare, sa pamamagitan ng mabilis na committee deliberations at mahigpit na koordinasyon bago ang plenary debates, para maiwasan ang mga delay kapag ang mga panukala ay nasa floor na.

Sa agrikultura at food security, binigyang-diin ni Marcos ang pending amendments sa Rice Tariffication Law, amendments sa Fisheries Code, at amendments sa Coconut Farmers and Industry Trust Fund Act bilang key priorities ng Kamara tungo sa mas matatag na production support, market stability at safeguards para sa mga magsasaka at consumers.

Sa health, iginiit ni Marcos ang pending amendments sa Universal Health Care Act bilang isa sa mga repormang isinusulong ng Kamara, habang nire-review ng mga mambabatas kung papaano palawakin ang access, pagandahin ang service delivery at gawing mas responsive ang mga serbisyo, base sa mga tunay na pinagdadaanan ng mga pasyente.

Sa edukasyon, binanggit ni Marcos ang Classroom-Building Acceleration Program, amendments sa Universal Access to Quality Tertiary Education Act, at amendments sa Local Government Code para sa special education fund bilang prayoridad ng Kamara, gayundin ang mga panukala para palakasin ang suporta sa mga mag-aaral at tulungan ang mga paaralan sa pang-araw-araw na hamon sa resources at pasilidad.

Sa social welfare, iginiit niya ang pending amendments sa Pantawid Pamilyang Pilipino Program (4Ps) Act at amendments sa Masustansyang Pagkain Para sa Batang Pilipino Act bilang mga nais isulong ng Kamara, dahil ang mga repormang ito ay proteksiyon para sa mga bulnerableng pamilya at pagpapalakas sa safety nets ng bansa.

“Marami sa amin ang naniniwala na service delayed is also service denied. Kung tingin ng administrasyon ay kailangan ng bansa ang mga panukalang ito na maging batas, then we will work with dispatch to enact them into laws so people can already enjoy their benefits,” ani Marcos.

“Alam namin na ang mga batas na may kinalaman sa pagkain, edukasyon at kalusugan ang pinakamadaling sukatin sa araw-araw na buhay ng mga tao, kaya doon kami magdodoble-kayod,” dagdag niya.

Bukod sa agikultura, health, edukasyon at social welfare priority track, kabilang din sa natitirang LEDAC measures ang panukalang modernisasyon ng Bureau of Immigration, National Land Use Act, paglikha ng Independent People’s Commission, Presidential Merit Scholarship Program, ikalawang waste-to-energy bill, excise tax sa single-use plastics, Philippine Civil Registration and Vital Statistics Act, palakasin ang Bases Conversion and Development Authority, disaster risk financing insurance, amendments sa Magna Carta for MSMEs, Right to Information bill, reprogramming ng Seal of Good Local Governance, general tax amnesty bill, panukalang batas sa gambling, masterplan para sa infrastructure at national development, Progressive Budgeting for Better and Modernized Governance Act, pag-disqualify sa kamag-anak ng mga opisyal hanggang fourth degree sa mga partikular na government contracts, Cybersecurity Act, Digital Payments Act, fair use of social media bill, artificial intelligence at internet technology sa eleksiyon, Magna Carta for Barangays, amendments sa Downstream Oil Industry Deregulation Law, amendments sa Biofuels Act, panukala para i-waive ng civil servants ang bank secrecy, amendments sa Anti-Money Laundering Act, Citizen Access and Disclosure of Expenditures for National Accountability (CADENA) Act, Anti-Political Dynasty bill, at Party-list System Reform Act.

“We’re not promising miracles, but we are committing to hard deadlines, tighter coordination and a House that treats time as a responsibility. If we want real reforms, we have to deliver with the urgency the public expects from us,” pahayag ni Marcos.