NILINAW ni Senate President Vicente “Tito” Sotto III na hindi pa opisyal ang kumakalat na partial committee report ng Senate Blue Ribbon Committee kaugnay ng umano’y katiwalian sa flood-control at iba pang proyektong pang-imprastruktura.

Ayon kay Sotto, draft pa lamang ang dokumento at hindi pa ito pinal na ulat ng Committee on Accountability of Public Officers and Investigations.

“Because it’s not an official report. The official one will be discussed tmrw pa. Mali yun nag leak na mro,” ani Sotto sa mensaheng ibinahagi sa mga mamamahayag.

Ang partial report, na may 456 na pahina, ay naglalaman ng buod ng mga testimonya at dokumentong iniharap sa mga pagdinig ng Senado at nagrerekomenda na imbestigahan ng Office of the Ombudsman ang ilang dati at kasalukuyang senador at kongresista, mga umano’y intermediary, at mga opisyal ng Department of Public Works and Highways dahil sa posibleng paglabag sa mga batas laban sa katiwalian.

Batay sa mga bahaging nakita ng media, tinukoy sa draft report ang mga umano’y “ghost” at substandard projects at inirekomenda ang karagdagang imbestigasyon sa posibleng mga kasong gaya ng malversation of public funds and property at direct bribery.

Kabilang sa mga pinangalanan sa partial report sina dating senador Ramon “Bong” Revilla Jr., Senador Jose “Jinggoy” Estrada, Senador Francis “Chiz” Escudero, Senador Joel Villanueva, dating kinatawan Elizaldy “Zaldy” Co, at dating kinatawan Mary Mitzi “Mitch” Cajayon-Uy, pati na ang ilang umano’y intermediary at maraming kasalukuyan at dating opisyal ng DPWH.

Ipinaliwanag ni Sotto na dahil draft pa lamang ang ulat, may mga senador na nagbawi ng kanilang mga pirma. “Kaya nag withdraw yun nag sign eh draft for discussion pa lang yan,” ayon sa kanya.

Tinuligsa rin niya ang pag-leak ng draft report, na aniya ay hindi pa handa para sa publiko. “Masyadong hot yun nag leak. Embarrassing,” dagdag ni Sotto.

Mas maaga noong Pebrero 3, ipinaalam nina Senador Juan Miguel “Migz” Zubiri, JV Ejercito, at Senador Sherwin Gatchalian kay Senate President Pro Tempore Panfilo “Ping” Lacson na binabawi nila ang kanilang mga pirma sa isang naunang draft ng committee report dahil may mga idinadagdag o inaamyendahan pa rito.

Sa ilalim ng mga patakaran ng Senado, ang mga committee report ay nananatiling rekomendasyon lamang at maaari pang baguhin hanggang sa pormal na pagtibayin ng buong kapulungan. Ang mga rekomendasyon ay hindi katumbas ng pagsasampa ng kaso at nangangailangan pa ng hiwalay na aksiyon ng Office of the Ombudsman.

Hanggang ngayon, wala pang inilalabas na pinal at opisyal na ulat ang Senate Blue Ribbon Committee.