SINABI nitong Sabado ni House Committee on Public Accounts Chairman Terry Ridon ng Bicol Saro Party-list na ang pahayag ni Bise Presidente Sara Z. Duterte na siya ay tatakbo sa pagkapangulo sa 2028 ay “hindi mahalaga” sa paghawak ng House of Representatives sa apat na reklamong impeachment laban sa kanya.

Binasura niya ang mga espekulasyon na maaaring makaapekto ang kanyang mga planong pulitikal sa mga mambabatas.

Si Ridon, na miyembro rin ng House Committee on Justice, ay nagsabing “laser-focused” o lubos na nakatuon ang mga mambabatas sa pagtukoy kung sapat sa porma at sa nilalaman ang mga reklamo, at hindi sa mga planong pulitikal na may kinalaman sa halalan sa 2028.

“Tingin ko irrelevant ‘yun pong deklarasyon ni Vice President Sara Duterte sa pagka-pangulo dito po sa disposition ng House Committee on Justice at ng House in general, sa impeachment po niya mismo,” ani Ridon sa ginanap na Saturday News Forum sa Quezon City.

Naglabas ng pahayag si Ridon matapos sabihin ng mga miyembro ng House mula sa National Unity Party (NUP) na malamang ay magbibigay sila ng conscience vote at hihintayin muna ang ebidensiya bago magpasya, na nagbunsod ng mga tanong kung nabago ba ng maagang anunsiyo sa pagkapangulo ni Duterte ang pulitikal na klima sa Kamara.

Ang House Committee on Justice, na pinamumunuan ni Batangas Rep. Gerville “Jinky Bitrics” Luistro, ay nakatakdang magsimula sa Marso 2 ng mga pagdinig sa apat na beripikadong reklamo na inaakusahan ang Bise Presidente ng culpable violation of the Constitution, betrayal of public trust, graft and corruption, bribery at iba pang mabibigat na krimen.

Ayon kay Ridon, ang unang tungkulin ng komite ay limitado sa pagtukoy kung sapat sa porma at sa nilalaman ang mga reklamo — ang mga itinakdang pamantayan ng Konstitusyon bago umusad ang proseso.

“Pagdedebatehan namin ito at bobotohan sa dalawang puntong iyon sa susunod na linggo. At kung magtutuloy-tuloy ito patungo sa ganap na pagdinig matapos ang determination of substance, makikita natin sa pagtatapos ng deliberasyon ng Justice Committee sa darating na Miyerkules,” ani Ridon.

Nilinaw din ng lider ng Kamara ang pagkakaiba ng mga planong elektoral at ng mga alegasyon tungkol sa mga nagawang kilos sa nakaraan.

“Ang deklarasyon ng Bise Presidente kaugnay ng kanyang pagkapangulo sa 2028 ay nakatuon sa hinaharap. Walang duda roon. Pero ang impeachment proceeding ay tumatalakay sa mga alegasyong ginawa umano niya noon. Kaya sa tingin ko, doon magtutuon ang komite at sa huli ay doon din magtutuon ang Kamara,” ani Ridon.

Sa parehong media forum, ipinahayag ni Fr. Joel Saballa, isa sa mga naghain ng ikatlong reklamong impeachment na inihain ng mga grupong panrelihiyon, ang kanyang kumpiyansa na mananaig ang kanilang kaso batay sa merito nito.

Aniya, sa nakaraang Kongreso, itinuring na sapat sa porma at sa nilalaman ang kanilang reklamo at hindi ito ibinasura, at ang kanilang muling inihain ay halos kapareho pa rin.

“Kaya kung ang mga kongresista ay naniniwala doon sa ipinrisenta namin noong nakaraang taon, hindi kami mahihirapan kumuha ng suporta o boto mula sa kanila kasi hindi naman ito politically motivated. Ito ay may substance, may form,” ani Saballa.

Hinimok niya ang mga mambabatas na ibatay ang kanilang pasya sa merito ng reklamo at hindi sa mga konsiderasyong pulitikal.

“At naniniwala kami na sana ang mga kongresista ay mananatiling titingin at boboto para sa substance at form at hindi sa political pressure o anumang uri ng external pressure na maaaring umiiral sa kanila. Sana ay wala naman,” aniya.

Nakatuon ang mga reklamong impeachment laban sa Bise Presidente sa umano’y maling paggamit at pagli-liquidate ng confidential at intelligence funds, sinasabing pekeng o kulang na mga dokumento, pagtangging lubos na makipagtulungan sa mga imbestigasyon ng Kongreso, at mga alegasyon ng hindi maipaliwanag na yaman at mga hindi isinamang detalye sa kanyang Statements of Assets, Liabilities and Net Worth (SALN).

Iginiit ng mga naghain ng reklamo na wala umanong sapat na paliwanag o direktang sagot na ibinigay ang Bise Presidente, kaya humihiling sila ng konstitusyonal na pagpapasya mula sa Kamara.