TINAPOS ng Senado ang unang quarter matapos maipasa ang sunod-sunod na panukala para sa serbisyong panlipunan, seguridad sa pagkain, pananagutan sa publiko, at modernisasyon ng pamahalaan bago ito nag-adjourn hanggang Mayo 4.

Kabilang sa mga binanggit ng kapulungan ang mga panukalang magpapalawak ng suporta para sa mga taong may autism spectrum disorder, magpapalakas ng consumer protection, at magbibigay ng mas malawak na kaluwagan sa Department of Education sa pagpapatupad ng kurikulum.

Inaprubahan din ng Senado ang mga resolusyon para i-reset ang halalan sa Bangsamoro Autonomous Region in Muslim Mindanao at ratipikahan ang tratado sa United Kingdom ukol sa paglilipat ng mga sentenced persons.

Sa usapin ng reorganisasyon sa pamahalaan, inaprubahan ng kapulungan ang pagbuwag sa Optical Media Board at ang paglilipat ng mga tungkuling pangregulasyon nito sa Intellectual Property Office. Naipasa rin nito ang Congressional Commission on Agriculture, Fisheries, and Food Security Act, na layong iayos ang mga programa ng mga ahensiyang pang-agrikultura at palakasin ang suporta sa mga magsasaka at mangingisda.

Kabilang din sa mga naipasa ng Senado sa unang quarter ang Philippine Veterans’ Month Act, Law Enforcement Body-Worn Camera Act, Free Overseas Filipino Workers’ Financial Education Act, at Geographically Isolated and Disadvantaged Areas School Act.

Nakatakdang ipagpatuloy ng Senado ang regular nitong plenary sessions sa Mayo 4.